თბილისიდან ყაზანის მიმართულებით ახალი ავიარეისი ინიშნება

თბილისიდან ყაზანის მიმართულებით ახალი ავიარეისი ინიშნება, - ამის შესახებ  ტურიზმის ეროვნული ადმინისტრაციიდან იუწყებიან.

მათივე ინფორმაციით, ავიაკომპანია Georgian Airways რუსული ქალაქის მიმართულებით 2 ივნისიდან კვირაში ორჯერ იფრენს.

ახალ რეისთან დაკავშირებით ეკონომიკისა და მდგრადი განვითარების სამინისტროს ტურიზმის ეროვნულმა ადმინისტრაციამ რუსეთიდან საქართველოში ინფოტური მოაწყო.

ტურიზმის ეროვნული ადმინისტრაციის ინფორმაციით, ყაზანის წამყვანი ტურისტული კომპანიების 14 წარმომადგენელი საქართველოს სხვადასხვა რეგიონს ეწვია. ინფოტურის მონაწილეებმა თბილისის და მცხეთის ისტორიული უბნები მოინახულეს, კახეთში კი სასტუმროები და მარნები დაათვალიერეს.

ტუროპერატორებისთვის ტურიზმის ეროვნულმა ადმინისტრაციამ საქართველოს შესახებ სპეციალური პრეზენტაცია მოაწყო.