საფეხბურთო კლუბი ”დინამო” საცხოვრებელი კორპუსის მშენებლობასთან დაკავშირებით განცხადებას ავრცელებს
საფეხბურთო კლუბი ”დინამო” განცხადებას ავრცელებს. განცხადება ”დინამოს” ბაზის მიმდებარე ტერიტორიაზე საცხოვრებელი კორპუსის მშენებლობის შესახებ მერიის მიღებულ გადაწყვეტილებას ეხება, რომელსაც ”ინტერპრესნიუსი” უცვლელად გთავაზობთ:
”დინამოს” ბაზის მიმდებარე ტერიტორიაზე საცხოვრებული კორპუსის მშენებლობას თავიდანვე უკანონოდ მივიჩნევდით, მეტიც ამ ნაგებობის აღმართვა ფუნქციას უკარგავდა სპორტის იმ ობიექტს, სადაც აღიზარდა ჩვენი ქვეყნის არაერთი ლეგენდარული ფეხბურთელი.
ქალაქ თბილისის მერიის დღევანდელი გადაწყვეტილება არის უაღრესად სამართლიანი. მივესალმებით დედაქალაქის მუნიციპალიტეტის მთავრობის დადგენილებას, რომელიც ნათელი მაგალითია იმის, რომ სპორტზე და კერძოდ, ფეხბურთის განვითარებაზე ფიქრობენ. თბილისის მერია მხარში დაუდგა თავისი ქალაქის სახელოვან კლუბს - ”დინამოს” და აღადგინა სამართლიანობა.
გაითვალისწინა რა სასიქადულო ქართველი ვეტერანი ფეხბურთელის და სპორტსმენების, ასევე საზოგადოების მოწოდება და არ იქნა დაშვებული გამოუსწორებელი შეცდომა ქართული სპორტის მიმართ.
გილოცავთ ამ მნიშვნელოვან გამარჯვებას ”დინამო თბილისის” ქომაგებს, ქართული ფეხბურთის გულშემატკივრებს და ყველას ვისთვისაც ჩვენი კლუბის ისტორია, ასევე მისი მომავალი ძვირფასია”, - ნათქვამია ”დინამოს” განცხადებაში.