რა ქონებას ფლობს თბილისის მერობის კანდიდატი ელენე ხოშტარია?

დედაქალაქის მერობის ერთ-ერთი კანდიდატი, პარტია „ევროპული საქართველოს“ რიგებიდან, პარლამენტის წევრი ელენე ხოშტარიაა.

გასული წლის 31 დეკემბერს შევსებული ქონებრივი დეკლარაციის მიხედვით, მერობის ერთ-ერთი კანდიდატი ტაბახმელაში 423 კვადრატული მეტრი ფართობის საცხოვრებელ სახლს ფლობს; ასევე ამავე მისამართზე მდებარე 1 502 კვ. მეტრის მიწის ნაკვეთს; 180.60 კვ. მეტრის აგარაკს იყალთოში; ამავე მისამართზე მდებარე 5 179 კვ. მეტრი ფართობის მიწის ნაკვეთს.

დეკლარაციის შევსების მომენტში ხოშტარიას ,,თი-ბი-სი“ ბანკის სახელფასო ანგარიშზე - 1 000 ლარი; „საქართველოს ბანკის“ მიმდინარე ანგარიშზე 100 ლარი ჰქონდა. მასვე ნაღდი ფულადი თანხის სახით 100 ლარი ჰქონდა.

მისმა შემოსავალმა „თავისუფალ უნივერსიტეტში“ ლექტორობისას 40 000 ლარი, „საქართველოს რეფორმების ასოციაციის“ თანადამფუძნებელის თანამდებობაზე კი 24 ათასი ლარი შეადგინა.

დეკლარაციის შევსების მომენტში მერობის კანდიდატს ელენე ხოშტარიას „თი-ბი-სი“ ბანკში 126 000 დოლარის ოდენობის იპოთეკური სესხი ჰქონდა, რომლის გასავალმაც გასულ წელს 126 000 ლარი შეადგინა.

ხოშტარიას ჰყავს მეუღლე - ირაკლი ბერიძე და შვილები - გიორგი გაფრინდაშვილი, ნატალია, კონსტრანტინე და რატი ბერიძეები. დეკლარაციის მიხედვით ხოშტარიას მეუღლე ფლობს 66.43 კვადრატული მეტრი ფართობის ბინას თბილისში, რომლის მხოლოდ 25% ეკუთვნის მას; მის საკუთრებაშია ასევე 185 კვ. მეტრის, 60 კვადრატული მეტრის, 185 კვ. მეტრისა და 60 კვადრატული მეტრის ფართობის ბინები თბილისში.

დეკლარაციის შევსების მომენტში ირაკლი ბერიძეს BGEO Group PLC 480 აქცია და JSC Medical Corporation EVEX 8 ობლიგაცია ჰქონდა. მისმა შემოსავალმა სამშენებლო კომპანია M2-ის დეველოპმენტის დირექტორის პოსტზე 102 000 ლარი შეადგინა. ბერიძეს 52 000 ლარის ოდენობის იპოთეკური სესხი ჰქონდა „თი-ბი-სი“ ბანკში, რომლის შემოსავალმაც 52 000 ლარი შეადგინა; „საქართველოს ბანკში“ 5 000-5 000 ლარის ოდენობის სამომხმარებლო სესხები ჰქონდა, თითოეულ სესხზე შემოსავალმა 5 000 ლარი შეადგინა.