2017 წლის რთველის ორგანიზებულად ჩატარების უზრუნველსაყოფად, საკოორდინაციო შტაბი შეიქმნება

2017 წლის რთველის ორგანიზებულად ჩატარების უზრუნველსაყოფად, საკოორდინაციო შტაბი შეიქმნება , - მთავრობამ დღევანდელ სხდომაზე „2017 წლის რთველის ხელშეწყობის ღონისძიებების შესახებ“ განკარგულების პროექტი დაამტკიცა.

სოფლის მეურნეობის სამინისტროს ინფორმაციით, საკოორდინაციო შტაბი სსიპ ღვინის ეროვნული სააგენტოს, სოფლის მეურნეობის, ეკონომიკისა და მდგრადი განვითარებისა და შინაგან საქმეთა სამინისტროების, ააიპ სოფლის მეურნეობის პროექტების მართვის სააგენტოს და სახელმწიფო რწმუნებულების - გუბერნატორების (კახეთის, რაჭა-ლეჩხუმისა და ქვემო სვანეთის რეგიონები) წარმომადგენლების შემადგენლობით იქნება.

უწყების ინფორმაციით, ყურძნის რეალიზაციისთვის თვითმმართველ ქალაქებში გამოიყოფა სპეციალური ადგილები.

სამინისტროს ცნობით, წარმოების გაზრდის ხელშეწყობის მიზნით, ღვინისა და ალკოჰოლიანი სასმელების მწარმოებელი კომპანიებისათვის, შეღავათიანი აგროკრედიტის პროექტის ფარგლებში, გაგრძელდება სესხების გაცემა საბრუნავი საშუალებების მიზნობრიობით.

მათივე ინფორმაციით, 2017 წელს შენარჩუნდება იაფი აგროკრედიტი ყურძნის შესყიდვის მიზნობრიობით შეღავათიანი აგროკრედიტის საპროცენტო განაკვეთის სახელმწიფოს მიერ თანადაფინანსების გზით ყურძნის გადამამუშავებელი საწარმოებისთვის შესაძლებელი გახდება 2017 წლის სეზონზე ყურძნის შესაძენად მიიღონ იაფი ფულად რესურსი, რომელიც გამოყენებული იქნება ფერმერებისგან ყურძნის შესაძენად, რაც თავის მხრივ ხელს შეუწყობს მოსავლის წარმატებით დაბინავებას. 15 თვიანი იაფი აგროკრედიტი ყურძნის შესყიდვის მიზნობრიობით კახეთში; 36 თვიანი იაფი აგროკრედიტი რქაწითელის და კახური მწვანეს შესყიდვის მიზნობრიობით სპირტად გამოხდის შემთხვევაში. უკანასკნელ წლებში საქართველოში ხორციელდება ყურძნის ჩაბარებისა და გადამუშავების ხელშემწყობი პროგრამები.

შეღავათიანი აგროკრედიტი საბრუნავი საშუალებების დასაფინანსებლად 2017 წელს გაიცემა ყურძნის გადამამუშავებელი საწარმოებისთვის ღვინის წარმოებისთვის და საბრენდე სპირტის წარმოების მიზნით, რომელიც ითვალსწინებს: ღვინის ქარხნების მიერ რთველის პერიოდში მიღებული ყურძნის შესასყიდად საჭირო სესხის მოცულობის საპროცენტო ხარჯის თანადაფინანსებას შემდეგი პირობებით: სესხის მაქსიმალური ვადა ღვინის მწარმოებელი ყურძნის ჩამბარებლებისათვის - 15 თვე; სესხის მაქსიმალური ვადა ყურძნისგან სპირტის გამოხდის შემთხვევაში - 36 თვე; სესხის მინიმალური და მაქსიმალური მოცულობა ყურძნის გადამამუშავებელი საწარმოებისთვის ღვინის წარმოებისათვის - 20,000 - 10 000 0000 ლარი; სესხის მინიმალური და მაქსიმალური მოცულობა ყურძნის გადამამუშავებელი საწარმოებისთვის, რომლებიც ყურძნის შეძენას მოახდენენ სპირტის წარმოების მიზნით - 20 000 - 15 000 000 ლარი;

როგორც ღვინის წარმოებისათვის ასევე სპირტის წარმოების მიზნით ჩაბარებული ყურძნის შემთხვევაში საწარმოების მიერ, სესხის საპროცენტო სარგებლის თანადაფინანსება მოხდება სააგენტოს მიერ სესხის ძირითადი თანხის წლიური 8%-ის ოდენობით, რომელსაც სოფლის მეურნეობის პროექტების მართვის სააგენტო გადაიხდის სესხის დაფარვის გრაფიკის შესაბამისად, მსესხებლის მიერ სესხის გადახდის პარალელურად.

როგორც ღვინის წარმოებისათვის ასევე სპირტის წარმოების მიზნით ჩაბარებული ყურძნის შემთხვევაში საწარმოების მიერ აღებული სესხის დაფარვა მოხდება არასტანდარტული გრაფიკით. საფინანსო ინსტიტუტის მიერ ბენეფიციარისთვის საშეღავათო პერიოდი, როგორც ძირითადი თანხის, ასევე საპროცენტო სარგებლოს გადახდაზე განსაზღვრული იქნება არანაკლებ 2018 წლის 15 იანვრამდე, ხოლო სპირტის წარმოების მიზნით ჩაბარებული ყურძნის შემთხვევაში 2018 წლის 15 მაისამდე.

თითოეულმა საწარმომ რომელიც ისარგებლებს შეღავათიანი აგროკრედიტით საბრუნავი საშუალებებისთვის უნდა წარმოადგინოს ღვინის ეროვნული სააგენტოს გაცემული დოკუმენტით გადამუშავებული ყურძნის მოცულობასა და ღირებულების შესახებ და მხოლოდ ამის შემდეგ განხორციელდება პროცენტის თანდაფინანსება.

საწარმოებს, რომლებსაც სურთ საბრუნავი შეღავათიანი აგროკრედიტის აღება სპირტის წარმოების მიზნით, სააგენტო განახორციელებს მხოლოდ „რქაწითელისა“ და კახური მწვანეს“ ჯიშების ყურძნის შესაძენად აღებული კრედიტის საპროცენტო სარგებლის თანადაფინანსებას.

უწყების ცნობით, სოფლის მეურნეობის სამინისტრო მეღვინეობის დარგის ხელშეწყობის მიზნით 2013 წლიდან დღემდე ანხორციელებს სხვადასხვა სახის მასტიმულირებელ პროექტებს რომლის ფარგლებშიც წახალისდა, როგორც წვრილი ასევე მსხვილი საწარმოების შექმნა, რომლებსაც მნიშვნელოვან წვლილი შეაქვთ რთველის წარმატებით ჩატარებაში; შეღავათიანი აგროკრედიტის ფარგლებში ალკოჰოლური სასმელების, ღვინის, სპირტის, ბრენდის წარმოების მიმართულებით შეიქმნა 24 ახალი საწარმო და გაფართოვდა - 48.

უწყების ცნობით, სოფლის მეურნეობის სამინისტროს მიერ განხორციელებული საპროცენტო ხარჯის თანადაფინანსება საბრუნავი საშუალებებისთვის ზრდის მეწარმეებისთვის შეღავათიან ფინანსებზე ხელმისაწვდომობას. 2017 წელს აგროდაზღვევის პროგრამის ფარგლებში დაიზღვა 5,123 ჰა ვენახი. გაცემული პოლისების რაოდენობა შეადგენს 6,796 ხოლო სადაზღვევო ლიმიტი 42,422,837 ლარს. სახელმწიფოს მიერ გადახდილი პრემია შეადგენს 1,802,970 ლარს.