ანაკლიის განვითარების კონსორციუმმა თურქმენეთის საზღვაო ნავსადგურთან ურთიერთგაგების მემორანდუმი გააფორმა
თურქმენეთში, ქალაქ აშხაბადში, ანაკლიის განვითარების კონსორციუმსა და ქალაქ თურქმენბაშის საერთაშორისო საზღვაო ნავსადგურს შორის ურთიერთგაგების მემორანდუმი გაფორმდა.
ურთიერთგაგების მემორანდუმი ორ ნავსადგურს - ანაკლიასა და თურქმენბაშს შორის ტვირთბრუნვის, ტრანსპორტირების, ლოჯისტიკისა და ნავსადგურის ოპერირების სფეროებში თანამშრომლობას შეეხება. მხარეები შეთანხმდნენ საქონლისა და კონტეინერების გადასაზიდად ერთობლივი რეგიონალური და საერთაშორისო თანამშრომლობის დანერგვაზე, ასევე თითოეული ნავსადგურის გეოგრაფიული მდებარეობის მიხედვით საჭირო ინფრასტრუქტურის შექმნაზე, საზღვაო ვაჭრობის სფეროში საკუთარი გამოცდილების ერთმანეთისათვის გაზიარებასა და ორ ნავსადგურს შორის მსოფლიო ვაჭრობის საკითხებში ბიზნეს შესაძლებლობების განვითარებაზე.
„ახალი პორტის მშენებლობის შემდეგ მნიშვნელოვანია ტვირთების მოზიდვა ცენტრალური აზიის ქვეყნებიდან, მათ შორის თურქმენეთიდან“, - განაცხადა ანაკლიის განვითარების კონსორციუმის გენერალურმა დირექტორმა ლევან ახვლედიანმა.