დღეიდან N150 მარშრუტზე MAN-ის ავტობუსები ივლიან
კიდევ ერთი სიახლე გვაქვს პეკინის გამზირთან მიმართებაში - პეკინის გავლით მოძრავი N150 ყვითელი ავტობუსები დღეიდან ჩანაცვლდა ახალი MAN-ის მარკის ავტობუსებით , - ამის შესახებ თბილისის მერმა დავით ნარმანიამ დედაქალაქის მთავრობის სხდომაზე განაცხადა.
"ჩვენ ველოდებოდით პეკინის ქუჩის რეაბილიტაციის დასრულებას და როგორც კი დასრულდა სავალი ნაწილის აღდგენა, ახალი ავტობუსები შევიდა ხაზზე", - განაცხადა დავით ნარმანიამ.
N150 მარშრუტი უნივერსიტეტის მაღლივი კორპუსიდან ვაჟა-ფშაველას გამზირის, ახლად რეაბილიტირებული პეკინის ქუჩის, მელიქიშვილისა და რუსთაველის გამზირების გავლით ბარათაშვილის ხიდამდე მოძრაობს. ხოლო უკუმიმართულებით 26 მაისის მოედნიდან მოძრაობას კოსტავასა და შარტავას ქუჩებზე აგრძელებს და ვაჟა-ფშაველას გამზირს კალანდაძის ქუჩიდან უკავშირდება.