ეკონომიკის სამინისტროს შენობა სავარაუდოდ, ორთაჭალაში „ბიზნეს სახლის“ გვერდით აშენდება
ეკონომიკისა და მდგრადი განვითარების სამინისტროს შენობა სავარაუდოდ, ორთაჭალაში „ბიზნეს სახლის“ გვერდით აშენდება , - ამის შესახებ ეკონომიკისა და მდგრადი განვითარების მინისტრმა გიორგი გახარიამ ეკონომიკის სამინისტროს შენობის შესახებ დასმული კითხვის საპასუხოდ განაცხადა.
კითხვაზე, რამდენი უჯდება ეკონომიკის სამინისტროს ამჟამინდელი შენობის ქირა, მინისტრს ზუსტი ინფორმაცია არ აქვს.
“ეკონომიკის სამინისტრო ქირით შენობაში ყოფნას დიდხანს არ აპირებს. ეკონომიკის სამინისტროს აქვს პროექტი, რომლის განხორციელებაც დაიწყება წლის ბოლომდე და შესაბამისად, სამინისტროს ექნება თავისი შენობა“, - განაცხადა გახარიამ.
მისივე თქმით, ორთაჭალაში უკვე არის სამინისტროების უმრავლესობა, მათ შორის, ფინანსთა სამინისტრო, შემოსავლების სამსახური, იუსტიციის სამინისტრო, გარემოს დაცვის სამინისტრო და თუ მათ სიახლოვეს იქნება ეკონომიკის სამინისტროც, ხარჯების მართვის ნაწილში ბევრად უფრო მომგებიანი იქნება.
„ჩვენ ვაკეთებთ ორთაჭალაში „ბიზნეს ჰაუსს“ და იქ გვერდზე, სავარაუდოდ, იქნება ეკონომიკის სამინისტრო“, - განაცხადა გახარიამ.