სპეციალისტები მოსახლეობას მოუწოდებენ, ციტრუსოვანი კულტურების დაცვის მიზნით, აზიური ფაროსანას საწინააღმდეგო წამლობა დროულად განახორციელონ

სურსათის ეროვნული სააგენტოს მცენარეთა დაცვის სპეციალისტები ციტრუსოვანი კულტურების დაცვის მიზნით, მოსახლეობას მოუწოდებენ სააგენტოს მიერ გადაცემული პრეპრატებით დროულად განახორციელონ აზიური ფაროსანას საწინააღმდეგო წამლობა.

როგორც სურსათის ეროვნული სააგენტოს პრესსამსახური იუწყება, ქიმიური წამლობისას მნიშვნელოვანია პრეპარატების გამოყენების წესების და ვადების დაცვა.

„ბიფენტრინის შემცველი პრეპარატი (ზონდერი 100ეკ; ინსაკარი 100ეკ; თეიქოფ 100ეკ) მაღალეფექტური, ფართო სპექტრის ინსექტიციდია, რომელიც გამოიყენება აზიური ფაროსანას, ფოთლის მავნებლების, ყურძნის ჭიის, ტკიპების, ბუგრების, ნაყოფჭამიების, ხვატარის, ხოჭოების, მავნე კუსებურას და სხვა მავნებლების წინააღმდეგ ხეხილში, ბოსტნეულში, ვაზში, მარცვლეულსა და პარკოსნებში. აზიური ფაროსანას წინააღმდეგ ბიფენტრინით წამლობა ტარდება სხვადასხვა შემასხურებელი მოწყობილობის მეშვეობით, მათ შორის, ზურგსაკიდი აგრეგატებით.

პრეპარატის კონცეტრაცია 10 ლიტრ წყალზე 30 მილიგრამს უნდა შეადგენდეს.

რეკომენდებული ნორმებით გამოყენებისას, პრეპარატი არ არის ფიტოტოქსიკური მცენარეების მიმართ. პრეპარატის დაცვითი მოქმედების ეფექტია 10-14 დღე.

მნიშვნელოვანია, ლოდინის პერიოდის დაცვა მოსავლის აღებამდე: 21 დღე - ციტრუსოვან კულტურებზე, 30 - დღე სხვა მრავალწლიან კულტურებზე, 20 - დღე მარცვლეულზე, 15 დღე -ბოსტნეულსა და პარკოსნებზე. ბიფენტრინის გამოყენება შესაძლებელია სხვა კლასის პესტიციდებთან ერთად კომბინირებულ ნაზავში, გარდა ძლიერი ტუტე და მჟავა რეაქციის მქონე პრეპარატებისა.

პესტიციდების გამოყენებისას, მნიშვნელოვანია, უსაფრთხოების წესების დაცვა. პრეპრატების გამოყენების ინსტრუქცია იხილეთ თანდართული ლინკზე: http://nfa.gov.ge/uploads/other/6/6545.pdf“, - ნათქვამია სურსათის ეროვნული სააგენტოს განცხადებაში.

აზიურ ფაროსანასთან ბრძოლის მიზნით პრეპარატები, 230 ათას ოჯახს საქართველოს მთავრობის გადაწყვეტილებით გადაეცემა. მავნებლის საწინააღმდეგო პრეპარატების დარიგების პროცესი სამეგრელოს, გურიის, იმერეთის, აჭარის იმ მუნიციპალიტეტებში მიმდინარეობს, სადაც მავნებელია გავრცელებული. ერთ ოჯახს ერთი ლიტრი პრეპარატი, ფერომონი (მავნებლის მოსაზიდი ხაფანგი) და მათი გამოყენების ინსტრუქცია და საინფორმაციო მასალები გადაეცემა.

სოფლის მეურნეობის სამინისტროს სურსათის ეროვნულმა სააგენტომ სამგერლოს, გურიის, იმერეთის და აჭარის მუნიციპალიტეტებს გადასცა პრეპარატები; სამეგრელოს რეგიონი -116 000; გურია - 50 670; იმერეთი - 38 838; აჭარა - 13 000. პრეპარატების გადაცემას ადგილობრივი მუნიციპალიტეტები უზრუნველყოფენ.