რაჭაში ღორის ფერმები და ლორის შესაბოლი შენობა-ნაგებობები გაიხსნა

გაერო-ს სურსათისა და სოფლის მეურნეობის ორგანიზაციის, FAO-ს მიერ რაჭა-ლეჩხუმსა და ქვემო სვანეთში ფერმერებისთვის აშენებული ღორის ფერმები და ლორის შესაბოლი შენობა-ნაგებობები სოფლის მეურნეობის მინისტრის პირველმა მოადგილე ნოდარ კერესელიძემ დაათვალიერა.

როგორც  გაეროს სურსათისა და სოფლის მეურნეობის ორგანიზაციიდან აცხადებენ, შესრულებული სამუშაოების პრეზენტაციას FAO-ს წარმომადგენელი საქართველოში, მამუკა მესხი და დონორი ორგანიზაციის - ავსტრიის განვითარების სააგენტოს წარმომადგენლებიც დაესწრნენ.

FAO-მ სოფლის განვითარების ხელშეწყობის ფარგლებში, რაჭაში სულ 60 ბენეფიციარი დააფინანსა. ლორის შესაბოლი და მეღორეობისთვის განკუთვნილი თანამედროვე შენობა-ნაგებობების გარდა, ფერმერებს სოფლის მეურნეობისთვის აუცილებელი ინვენტარი და ხელსაწყოები გადაეცათ. დაფინანსებულებს შორის მოხვდნენ მეღვინეები, სოკოს მწარმოებლები, მეფუტკრეები და დურგლები, რომლებიც სასოფლო-სამეურნეო ინვერტარს ამზადებენ.

ფერმების დათვალიერების შემდეგ, სტუმრები ამბროლაურში პროექტის ბენეფიციარების მიერ მოწყობილ აგრო-პროდუქტების გამოფენა-დეგუსტაციას დაესწრნენ. იქვე გაიმართა პროექტის ბენეფიციარების შესახებ გადაღებული ვიდეოს ჩვენებაც, რომელშიც რაჭაში მცხოვრები ახალგაზრდები სოფელში ცხოვრების სირთულეებსა და სამომავლო გეგმებზე საუბრობენ.

FAO-ს მიერ რაჭაში განხორციელებული საპილოტე პროექტი დაფინანსებულია ავსტრიის განვითარების სააგენტოს (ADC) მიერ და პირდაპირი ფინანსური დახმარების გარდა, მიზნად ისახავს, ხელი შეუწყოს საქართველოში სოფლის განვითარების პროგრამას, რომელიც სოფლის მეურნეობის სამინისტროსთვის ერთ-ერთ პრიორიტეტულ მიმართულებას წარმოადგენს.