საქართველო 2018 წლის მოგზაურობისთვის საუკეთესო 10 ქვეყანას შორის მოხვდა

უმსხვილესი საერთაშორისო სამოგზაურო მედია პლატფორმამ Lonely Planet საქართველო 2018 წლის სამოგზაურო ქვეყნების ტოპ-ათეულში შეიყვანა, - ამის შესახებ ტურიზმის ეროვნული ადმინისტრაცია იუწყება.

მათივე ცნობით, Lonely Planet ყოველწლიურად აქვეყნებს მომდევნო წლის საუკეთესო მიმართულებებს, სადაც 2018 წლისთვის ერთ-ერთ საუკეთესო მიმართულებად საქართველო დასახელდა. ინფორმაცია გავრცელდა Lonely Planet-ის ყველა მედია საშუალებით.

პლატფორმის მთავარი კრიტერიუმი ქვეყნების მრავალფეროვანი ფლორა, ავთენტური არქიტექტურა და გემრიელი სამზარეულოა.

Lonely Planet საქართველოზე წერს, რომ ეს არის მომავალზე ორიენტირებული უძველესი ქვეყანა სამხრეთ კავკასიაში, რომელიც ამავდროულად უდიდეს პატივს სცემს თავის წარსულსა და ტრადიციებს.

„საქართველო ღვინისა და უძველესი კერძების ქვეყანაა, რომელიც მხოლოდ მომავლისკენ იყურება. მისი უძველესი ისტორია და კულტურა არა მხოლოდ წარსულია, არამედ აწმყო. ქართული ღვინო იმდენად საამაყოა ამ ქვეყნისთვის, რომ ხშირად მესაზღვრეები აეროპორტში წითელი ღვინით ხვდებიან ჩამოსულ სტუმრებს“, - წერს Lonely Planet.

Lonely Planet წარმოადგენს საერთაშორისო უმსხვილეს სამოგზაურო მედია პლატფორმას. იგი მოიცავს, საერთაშორისო გზამკვლევების სერიას, წიგნებს და ონლაინ პლატფორმებს. კომპანია დაარსდა 1972 წელს და დღეს ერთ-ერთი წამყვანი პოზიცია უჭირავს თავის სფეროში. Lonely Planet-ის სტატიებზე, ბლოგებზე და გამოცემებზე მუშაობს 200-მდე ავტორი.

მიმდინარე წლის 25 ოქტომბერს იტალიაში, ქალაქ რომში ჩატარდა Lonely Planet-ის ყოველწლიური ღონისძიება Best in Travel. აქ იკრიბებიან საერთაშორისო მედიის და ტურიზმის ინდუსტრიის წარმომადგენლები მთელი მსოფლიოდან. აღსანიშნავია, რომ Best in Travel 2017-ზე ეკონომიკისა და მდგრადი განვითარების სამინისტროს ტურიზმის ეროვნულ ადმინისტრაციამ ქვეყნის პრეზენტაცია წარადგინა და დამსწრე საზოგადოებას საქართველოს ტურისტული პოტენციალი გააცნო.

„Lonely Planet გახლავთ მსოფლიოში ყველაზე აღიარებული და გავლენიანი სამოგზაურო გამოცემა და სამოგზაურო მედიაპლატფორმა, შესაბამისად, ტოპ ათეულში მოხვედრა ჩვენი ქვეყნისთვის დიდი წარმატებაა, ეს კიდევ ერთხელ ადასტურებს და საერთსშორისოდ აღიარებს, იმას რომ ჩვენს ქვეყანას გააჩნია ტურიზმის განვითარების სწორი ხედვა და ის საერთაშორისო აქტივობები, რომელსაც ვანხორციელებთ ეფექტურად მიმდინარეობს. Lonely Planet-ის მსოფლიო ათეულში საქართველოს მოხვედრა ხელს შეუწყობს მაღალ გადახმდელუნარიანი ტურისტების შემოსვლას ჩვენს ქვეყანაში“, - განაცხადა გიორგი ჩოგოვაძემ.