როგორც ნავთობპროდუქტების იმპორტიორთა კავშირში აცხადებენ, მიმდინარე თვეში ნავთობის ფასი მსოფლიო სასაქონლო ბირჟებზე იზრდება.
კერძოდ, აპრილის თვის დასაწყისიდან დღემდე, ლონდონში Brent ნავთობის ფასი გაიზარდა 105,62 დოლარიდან 110.33 დოლარამდე/ბარელზე, ხოლო ნიუ-იორკში Light Sweet ნავთობის ფასი 99,74 დოლარიდან 101.94 დოლარამდე/ბარელზე.
ნავთობის ფასის ზრდა რუსეთ-უკრაინის კრიზისის გაღრმავების ფონზე ხდება. აქვე უნდა აღინიშნოს, რომ აშშ-ში ნავთობის სტრატეგიული მარაგები საკმაოდ მაღალ ნიშნულზე დგას (1982 წლის შემდეგ ყველაზე მაქსიმალური მაჩვენებელი).
ნავთობის ფასის ზრდის პარალელურად, გაზრდილია ასევე საერთაშორისო ფასები ნავთობპროდუქტებზე Platt's-ის (რომელზეც დამოკიდებულია საქართველოში საწვავის ფასი) მიხედვით. კერძოდ, აპრილის თვის დასაწყისიდან 24 აპრილის მდგომარეობით ბენზინის ფასი გაზრდილია 42 დოლარით - 1029,75 დოლარამდე/ტონაზე; L-62 დიზელი გაზრდილია 39,75 დოლარით 912,50 დოლარამდე/ტონაზე; 10 PPM დიზელი მომატებულია 36,75 დოლარით 937,25 დოლარამდე/ტონაზე;
რაც შეეხება საქართველოს საცალო ქსელს, აპრილის თვეში რეგულარი და L-62 დიზელის საწვავის ფასი საშუალოდ 3 თეთრით/ლიტრზე გაიზარდა, ხოლო დანარჩენი პროდუქტების ფასი იგივეა.
ნავთობპროდუქტების იმპორტიორთა კავშირის ინფორმაციით, დღეისთვის ბრენდირებულ საცალო ქსელში საწვავის საშუალო ფასი შეადგენს: სუპერის ტიპის ბენზინი - 2.22-2.30 ლარი/ლიტრზე, პრემიუმის ტიპის ბენზინი - 2.15-2.25 ლარი/ლიტრზე, ევრო რეგულარის ტიპის ბენზინი - 2.00-2.10 ლარი/ლიტრზე, რეგულარის ტიპის ბენზინი - 2,05 ლარი/ლიტრზე, ევრო დიზელი - 2.17-2.25 ლარი/ლიტრზე, L-62 დიზელი - 2.05-2.09 ლარი/ლიტრზე. ხოლო არაბრენდირებულ ავტოგასამართ სადგურებზე 1 ლიტრი საწვავის ფასი 5-10 თეთრით უფრო ნაკლებია.