"არასასიამოვნოა ცინიკური დამოკიდებულებით საუბარი ორ მილიონ ლარზე, რომელიც წვრილი მედიასაშუალებებისთვის მნიშვნელოვან შემოსავალს შეიძლება წარმოადგენდეს"
ეს ორი მილიონი, რომელზეც ასე აგდებით და ქილიკით მიდის ხოლმე საუბარი, ოთხ არხზე რომ განაწილდეს, უამრავი რაღაცის გაკეთება იქნება შესაძლებელი და კიდევ უფრო გადავასწრებთ რეიტინგებში საზოგადოებრივ მაუწყებელს , - ამის შესახებ ”პალიტრანიუსის” გადაცემაში ”360 გრადუსი” ”ტვ პირველის” კომერციულმა დირექტორმა, ნანა აბურჯანიძემ განაცხადა.
მისი თქმით, არსებული დაფინანსებით საზოგადოებრივი მაუწყებელი კონკურენციას უნდა უწევდეს მსხვილ მედიასაშუალებას, მაგრამ დღეის მდგომარეობით ის ამას ვერ ახერხებს. ”ტვ პირველის” კომერციული დირექტორის შეფასებით, არასასიამოვნოა ცინიკური დამოკიდებულებით საუბარი ორ მილიონ ლარზე, რომელიც წვრილი მედიასაშუალებებისთვის მნიშვნელოვან შემოსავალს შეიძლება წარმოადგენდეს.
”საზოგადოებრივი მაუწყებელი დღევანდელი რეიტინგებით კონკურენციას უწევს ”პალიტრანიუსს”, ”კავკასიას” და ”ტვ პირველს”, ის არ უწევს კონკურენციას ”რუსთავი2“-ს და ”იმედს”, თუმცა, იმ დაფინანსებითაც კი, რაც აქვს, კონკურენციას სწორედ მათ უნდა უწევდეს. საზოგადოებრივ მაუწყებელს ”რუსთვი2”-ის და ”იმედის” ჯამური ბიუჯეტი აქვს გარანტირებულად. ეს ორი მილიონი, რომელზეც ასე აგდებით და ქილიკით მიდის ხოლმე საუბარი, თუნდაც ამ ოთხ არხზე რომ განაწილდეს, უამრავი რაღაცის გაკეთება იქნება შესაძლებელი და კიდევ უფრო გადავასწრებთ რეიტინგებში საზოგადოებრივ მაუწყებელს”, - განაცხადა ნანა აბურჯანიძემ.