კონსტანცას პორტი ანაკლიის ღრმაწყლოვანი ნავსადგურის პროექტით დაინტერესდა

კონსტანცას პორტი ანაკლიის ღრმაწყლოვანი ნავსადგურის პროექტით დაინტერესდა. ამის შესახებ  ანაკლიის განვითარების კონსორციუმი იუწყება.

მათივე ცნობით, პორტის ოფიციალური დელეგაცია გენერალური მენეჯერის, ნიკოლაი დან ტივლიკის ხელმძღვანელობით „ანაკლიის განვითარების კონსორციუმს“ ესტუმრა და პროექტს დეტალურად გაეცნო. შეხვედრაზე ორი პორტის მენეჯმენტმა ურთერთთანამშრომლობის მემორანდუმის დეტალებიც განიხილა, რომლის გაფორმებაც უახლოეს მომავალში დაიგეგმა.

კონსტანცას პორტი მხარდაჭერას უცხადებს ანაკლიის ღრმაწყლოვანი ნავსადგურის მშენებლობას, რომელიც 2017 წლის 20 დეკემბერს იწყება. კონსტანცას წარმომადგენლები მიიჩნევენ, რომ ანაკლიის პორტი მნიშვნელოვნად გააუმჯობესებს საერთო სატრანზიტო დერეფნის კონკურენტუნარიანობას; გააჩენს ახალ შესაძლებლობებს, გაიზარდოს ტვირთბრუნვა ევროპასა და აზიას შორის რუმინეთისა და საქართველოს გავლით.

კონსტანცას პორტი შავი ზღვის აუზის სანაპიროს ერთ-ერთი უმსხვილესი პორტია, რომელიც შავი ზღვის დასავლეთ სანაპიროზე, რუმინეთში, 4000 ჰექტარზეა განლაგებული და წელიწადში 100 მილიონი ტონა ტვირთის გამტარუნარიოანობა აქვს.

„ანაკლიის განვითარების კონსორციუმის“ წარმომადგენლები „თბილისის აბრეშუმის გზის“ ფორუმის ფარგლებში რეგიონული დერეფნის კორიდორის კიდევ 2 მსხვილ პორტთან გეგმავენ მემორანდუმის გაფორმებას.

„ანაკლიის განვითარების კონსორციუმი“ „თბილისის აბრეშუმის გზის“ ფორუმის პარტნიორია. ღრმაწყლოვანი პორტის, ქალაქისა და ეკონომიკური ზონის პროექტები ფორუმზე ერთ-ერთი ყველაზე აქტუალური თემა იქნება. 28-29 ნოემბერს ფორუმის ფარგლებში ანაკლიის პროექტის წარმომადგენლები 30-ზე მეტ კომპანიასთან ორმხრივ შეხვედრებს გამართავენ.

„თბილისის აბრეშუმის გზის“ ფორუმში 34 ქვეყნის 1000-მდე დელეგატი, მათ შორის უმაღლესი თანამდებობის პირები და პრემიერ-მინისტრები მიიღებენ მონაწილეობას.