არჩილ თალაკვაძის ქონება და მისი Harley-Davidson-ი - როგორ შეიცვალა ერთი წლის განმავლობაში საპარლამენტო უმრავლესობის ლიდერის ქონება

2016 წელს საპარლამენტო უმრავლესობის ლიდერმა, არჩილ თალაკვაძემ ორ სხვადასხვა თანამდებობაზე შემოსავლის სახით ჯამში, 103 544.47 ლარი მიიღო.

აქედან, თალაკვაძის შემოსავალმა შინაგან საქმეთა მინისტრის მოადგილის პოსტზე, გასული წლის 1 იანვრიდან 8 სექტემბრის ჩათვლით - 95 895,72 ლარი; 1 ნოემბრიდან 31 დეკემბრის პერიოდში პარლამენტის წევრობისას კი 7 648,75 ლარი შეადგინა.

მიმდინარე წლის 29 ნოემბერს შევსებული ქონებრივი დეკლარაციის მიხედვით, თალაკვაძე ფლობს 109,90 კვადრატული მეტრი ფართობის ბინას თბილისში; მასვე ეკუთვნის მოტოსატრანსპორტო საშუალება - Harley-Davidson-ი, რომელიც 2016 წელს 8 000 დოლარად შეიძინა.

რაც შეეხება ფინანსურ მდგომარეობას, საპარლამენტო უმრავლესობის ლიდერს დეკლარაციის შევსების მომენტში ,,თი-ბი-სი ბანკის“ სახელფასო ანგარიშზე 3 104,11 ლარი; საკრედიტოზე კი 10 424,50 ლარი ჰქონდა. ამასთან, როგორც ქონებრივ დეკლარაციაშია აღნიშნული, წინა წელს არჩილ თალაკვაძემ მინისტრის ბრძანებით (სამსახურებრივი) 1 200 დოლარის ღირებულების იარაღი მიიღო საჩუქრად.

მასვე დეკლარაციის შევსების მომენტში „თი-ბი-სი ბანკში“ 72 000 დოლარის ოდენობის იპოთეკური სესხი ჰქონდა, რომლის გასავალმაც გასულ წელს 9 143,45 დოლარი შეადგინა; 10 410 ლარის ოდენობის სესხი, რომლის შედეგადაც მისმა წლიურმა გასავალმა 8 137,02 ლარი შეადგინა. გარდა ამისა, სწავლის გადასახადის სახით თალაკვაძის გასავალი წინა წელს 4 500 ლარი იყო.

საპარლამენტო უმრავლესობის ლიდერს ჰყავს მეუღლე და ორი შვილი. დეკლარაციის შევსების მომენტში თალაკვაძის მეუღლეს „თი-ბი-სი ბანკში“ ჰქონდა 20 000 ლარის ოდენობის სამომხმარებლო და ასევე 3 351 ლარის ოდენობის სამომხმარებლო სესხი, რომლის წლიურმა გასავალმაც 2 984,48 ლარი შეადგინა.

იხილეთ ასევე: რა ქონების მფლობელია საპარლამენტო უმრავლესობის მომავალი ლიდერი არჩილ თალაკვაძე