„1 იანვრიდან ტექდათვალიერება 187 ათას ავტოსატრანსპორტო საშუალებას შეეხება“
2018 წლის 1 იანვრიდან საქართველოში ავტომობილების ტექნიკური ინსპექტირება ამოქმედდება და რეფორმა ეტაპობრივად განხორციელდება.
კერძოდ, 2018 წლის 1-ლი იანვრიდან ტექდათვალიერების გავლის ვალდებულება ექნებათ სამგზავრო (8 ადგილის ზემოთ) და სატვირთო (3,5 ტონის ზემოთ) ავტომობილებს.
როგორც "ტრანსპორტისა და გზების ასოციაციის" ხელმძღვანელმა, დავით მესხიშვილმა რადიო პალიტრას გადაცემაში „საქმე“ განაცხადა, საუბარია დაახლოებით, 187 ათას სატრანსპორტო საშუალებაზე.
აღსანიშნავია, რომ ამ კატეგორიის სატრანსპორტო საშუალებების ტექნიკური ინსპექტირების ვალდებულება არ შეწყვეტილა და მათ ტექდათვალიერება აქამდეც უნდა გაევლოთ.
„იმ ავტომობილების რაოდენობა, რომელთა ტექნიკური ინსპექტირების ვალდებულება არც შეწყვეტილა, დაახლოებით 187 ათასი ერთეულია. თუმცა, აღსანიშნავია, რომ ეს არის რეგისტრირებული ავტოსატრანსპორტო საშუალებათა მონაცემი და არ ვიცით რეალურად რამდენი გადაადგილდება გზებზე. ამასთან, ამ 187 ათასი რეგისტრირებული ავტოსატრანსპორტო საშუალებიდან 14%-ს აქვს ტექნიკური ინსპექტირება გავლილი,“-განაცხადა მესხიშვილმა.