პირველი იანვრიდან დეპოზიტების დაზღვევის სისტემა ამოქმედება
საქართველოს ფინანსთა მინისტრის, მამუკა ბახტაძის ხელმძღვანელობით, საქართველოს დეპოზიტების დაზღვევის სამეთვალყურეო საბჭოს სხდომა გაიმართა, რომელზეც სააგენტოს 2017 წლის საქმიანობის ანგარიში, შემუშავებული ნორმატიული აქტები განიხილეს.
როგორც ფინანსთა სამინისტროს მიერ გავრცელებულ ინფორმაციაშია ნათქვამი, საუბარი ასევე, შეეხო 2018 წელს დაგეგმილ ღონისძიებებსა და დეპოზიტების დაზღვევის სააგენტოს მომავალ საინვესტიციო პოლიტიკას.
ფინანსთა მინისტრმა კიდევ ერთხელ ხაზი გაუსვა აღნიშნული სისტემის მნიშვნელობას და აღნიშნა, რომ აუცილებელია თითოეული მოქალაქე დეტალურად იყოს ინფორმირებული დეპოზიტების დაზღვევის სისტემის თაობაზე და გაიზარდოს მოსახლეობის ინფორმირებულობის დონე.
ფინანსთა მინისტრის მოადგილის ნიკოლოზ გაგუას განცხადებით, დეპოზიტების დაზღვევის სისტემის ამოქმედება პირველი იანვრიდან არის დაგეგმილი.
„რამდენიმე თვის წინ ჩვენ მივიღეთ კანონმდებლობა დეპოზიტების დაზღვევის სისტემის შესახებ. 2018 წლის 1-ლი იანვრიდან იგეგმება აღნიშნული სისტემის ამოქმედება. დეპოზიტების დაზღვევის სისტემა ითვალისწინებს 5 ათასი ლარის ფარგლებში, ყველა დეპოზიტის დაზღვევას. ეს არის დამატებითი და ძალიან მნიშვნელოვანი ელემენტი ფინანსური სტაბილურობის სისტემაში. მოგეხსენებათ, საქართველოს საფინანსო სისტემა არა მხოლოდ ჩვენს რეგიონში გამოირჩევა მდგრადობით, შესაბამისად, ეს კიდევ ერთი დამატებითი ელემენტი იქნება იმისათვის, რომ დეპოზიტარმა უფრო დაცულად იგრძნოს თავი,“ - აღნიშნა, ნიკოლოზ გაგუამ.
ამასთან, დეპოზიტების დაზღვევის სააგენტოს უფროსის ოთარ ძიძიკაშვილის განცხადებით, 1-ელი იანვრიდან დეპოზიტების დაზღვევის სააგენტო მზად იქნება, იმისთვის, რომ დეპოზიტების სისტემამ წარმატებულად იფუნქციონიროს.
„ესაა ძალიან მნიშვნელოვანი ფინანსური კომპონენტი როგორც მთლიანად ფინანსური სექტორის სტაბილურობის მიმართულებით, ისე ჩვენი მოქალაქეების ფინანსური სტაბილურობის დაცულობის კუთხით. 1-ლი იანვრიდან დეპოზიტების დაზღვევის სააგენტო სრულ მზადყოფნაში იქნება იმისათვის, რომ დეპოზიტების დაზღვევის სისტემა ქვეყანაში ამოქმედდეს და იფუნქციონიროს წარმატებულად“, - განაცხადა ოთარ ძიძიკაშვილმა.
დეპოზიტების დაზღვევის სამეთვალყურეო საბჭოს წევრები საბჭოს წევრები არიან: საქართველოს ფინანსთა მინისტრი, საქართველოს ეკონომიკისა და მდგრადი განვითარების მინისტრი, საქართველოს ეროვნული ბანკის პრეზიდენტი, 2 დამოუკიდებელი წევრი.