2016 -2017 წლის გამოშვების ავტომობილები საკონსტიტუციო სასამართლოს თავმჯდომარისთვის

2017 წლის 31 აგვისტოს მდგომარეობით საკონსტიტუციო სასამართლოს ბალანსზე 15 ავტომობილი ირიცხებოდა. ამის შესახებ თავისუფლების განვითარების ინსტიტუტის (IDFI) კვლევაშია აღნიშნული.

ამ ავტომობილებიდან 10 მოსამართლეებზე, ხოლო 2- სამართლებრივი უზრუნველყოფის და ეკონომიკური დეპარტამენტის უფროსებზეა განპიროვნებული.

ამასთან, IDFI-ს ცნობით, სასამართლოს ბალანსზე ირიცხება 2001 წელს შესყიდული "mercedes benz " e230 მოდელის ავტომობილი, რომელიც დაკარგულია და შინაგან საქმეთა სამინისტრო აწარმოებს ძიებას.

როგორც კვლევაში ვკითხულობთ, 2012-2017 წლებში საკონსტიტუციო სასამართლოს ავტოპარკის განახლებაზე ყველაზე დიდი თანხა დაიხარჯა 2016 და 2017 წელს. კერძოდ, 2017 წელს აღნიშნული მიმართულებით - 460,5 ათასი ლარი, 2016 წელს კი 179,5 ათასი ლარია დახარჯული.

ამ პერიოდში საკონსტიტუციო სასამართლოს მოსამართლეებისათვის შესყიდული იქნა 8 ავტომობილი. მათ შორის ყველაზე ძვირადღირებულია საკონსტიტუციო სასამართლოს თავმჯდომარისათვის 2017 წელს 176 150 ლარად შესყიდული Toyota land cruiser -ის მოდელის ავტომობილი. აღსანიშნავია, რომ საკონსტიტუციო სასამართლოს თავმჯდომარისთვის მიმდინარე წელს ასევე შეისყიდეს 2017 წელს გამოშვებული 37 172 ლარის ღირებულების TOYOTA COROLA-ს მოდელის ავტომობილი. რაც შეეხება სხვა მოსამართლეებს, მათთვის 2016-2017 წლებში Toyota CAMRY-ის და TOYOTA RAV 4 -ის მოდელის ავტომობილები შესყიდულია, რომელთა ფასი 55 ათასიდან 70 ათას ლარამდე მერყეობს.