შალვა ფიფია ლიტვის რესპუბლიკის დელეგაციის წევრებს შეხვდა
”საკითხები, რომლებიც შეხვედრაზე განვიხილეთ, განსაკუთრებულ მნიშვნელობას იძენს დღეს, როდესაც ევროკავშირთან ასოცირების ხელშეკრულების გაფორმების თარიღი უკვე ცნობილია”.
სოფლის მეურნეობის მინისტრი შალვა ფიფია ლიტვის რესპუბლიკის დელეგაციის წევრებს შეხვდა. დელაგაციას ლიტვის რესპუბლიკის სოფლის მეურნეობის მინისტრის მოადგილე მინდაუგას კუკლიერიუსი ხელმძღვანელობს.
შალვა ფიფიას განცხადებით, საკითხები, რომლებიც შეხვედრაზე განიხილეს, განსაკუთრებულ მნიშვნელობას იძენს დღეს, როდესაც ევროკავშირთან ასოცირების ხელშეკრულების გაფორმების თარიღი უკვე ცნობილია.
„ღრმა და ყოვლისმომცველი თავისუფალი ვაჭრობის შესახებ“ ხელშეკრულებაზე ხელმოწერა ქართული პროდუქციის ევროკავშირის ბაზარზე გატანის რეალურ პერსპექტივას ქმნის, შესაბამისად, სოფლის მეურნეობის დარგი ევროპული სტანდარტების შესაბამისად უნდა განვითარდეს, რაშიც გადამწყვეტი როლი ეკისრება დარგის სპეციალისტებისა და ფერმერების ცოდნის მაღალ დონეს. შეხვედრაზე აღნიშნული მიმართულებით ლიტვის რესპუბლიკის გამოცდილების გაზიარებაზე ვისაუბრეთ. მსოფლიოში ერთ-ერთი უმსხვილესი და კარგად განვითარებული ექსტენციის ცენტრები სწორედ ლიტვაში ფუნქციონირებს. მათ შექმნეს და დანერგეს პროგრამა, რომელშიც მთელი ქვეყნის მასშტაბით არიან ფერმერები ჩართული, რაც მათ საშუალებას აძლევს, ამომწურავი ინფორმაცია მიიღონ როგორც სასოფლო-სამეურნეო, ასევე საჭირო ფინანსურ საკითხებზე. თავის მხრივ, აღნიშნული პროგრამით ხელისუფლებას შესაძლებლობა აქვს, ოპერატიული და სრული ინფორმაცია მიიღოს, მოახდინოს ანალიზი და დაგეგმოს ხელშემწყობი, ეფექტიანი ღონისძიებები“, - განაცხადა შალვა ფიფიამ.
სამინისტროში გამართული შეხვედრის შემდეგ დაგეგმილია სემინარი, რომელზეც ლიტველი კოლეგები ექსტენციის ცენტრებისთვის შექმნილი სპეციალური თანამედროვე პროგრამის პრეზენტაციას გამართავენ და ქართველ კოლეგებს გამოცდილებას გაუზიარებენ.
ლიტვის დელეგაციის წევრები 16 მაისს თელავის რაიონის სოფელ ნაფარეულში, „ტყუპების საღვინე სახლში“ ქვევრის ღვინის მუზეუმის გახსნას დაესწრებიან.
ლიტვის რესპუბლიკის დელეგაცია საქართველოში სამი დღე დარჩება.