რატომ არის ვაჟა-ფშაველასა და საბურთალოს ქუჩებზე საცობი
ვაჟა-ფშაველასა და საბურთალოს ქუჩებზე საცობია, რაც ცინცაძისა და კარტოზიას ქუჩების გადაკვეთაზე ტრანსპორტის მოძრაობის სქემების დროებით შეცვლას უკავშირდება ცინცაძისა და კარტოზიას ქუჩების გადაკვეთაზე, გზაგამტარის სამშენებლო სამუშაოებიდან გამომდინარე, კერძო და საზოგადოებრივი ტრანსპორტის მოძრაობის სქემები დროებით შეიცვლება.
როგორც „ინტერპრესნიუსს“ თბილისის მერიიდან აცნობეს, გზაჯვარედინზე ცინცაძის ქუჩიდან ნებადართული იქნება მოძრაობა მხოლოდ მარჯვნივ - კარტოზიას ქუჩაზე, ხოლო პირდაპირ - თამარაშვილის ქუჩის მიმართულებით გადაადგილება და ამირეჯიბის გზატკეცილისკენ მობრუნება - შეიზღუდება.
სანაცვლოდ, ცინცაძიდან ამირეჯიბის გზატკეცილისა და ბახტრიონის ქუჩისკენ მოძრავ ავტომანქანებს ვლადიმერ და არჩილ ასათიანების ქუჩის პირველივე გადაკვეთაზე მარცხნივ მოხვევა შეეძლებათ.
გარდა ამისა, ყაზბეგის გამზირიდან კარტოზიას ქუჩაზე შესვლა მხოლოდ ადგილობრივი მოსახლეობის კუთვნილი ავტომანქანებისთვის იქნება ნებადართული.
კარტოზიას ქუჩაზე შეზღუდვის დაწესების გამო, საზოგადოებრივი ტრანსპორტი: N92 ავტობუსი და N27, 50, 81 და N100 მიკროავტობუსები გაივლიან თამარაშვილის ქუჩას, ყოფილ იპოდრომთან ვლადიმერ და არჩილ ასათიანების ქუჩაზე შეუხვევენ, საიდანაც მოძრაობას დადგენილი მარშრუტით განაგრძობენ.
ცინცაძე-კარტოზიას ქუჩების გადაკვეთაზე ახალი სატრანსპორტო კვანძის მოწყობის სამუშაოები 5 თვეში დასრულდება. პროექტის განხორციელებისთვის თბილისის მერიის ბიუჯეტიდან 2 მილიონ 700 ათასი ლარია გამოყოფილი.
ამ დროისთვის გზის აღნიშნულ მონაკვეთზე საავტომობილო მოძრაობა შეფერხებით ხდება და საცობებია.