ანაკლიის ღრმაწყლოვანმა პორტმა და ჩინურმა პორტმა ლიენიუნგანგმა ურთიერთთანამშრომლობის მემორანდუმი გააფორმეს

უმსხვილესი მულტინაციონალური კომპანიის “კოსკო შიფინგ ლაინზის“ დელეგაცია ანაკლიას სტუმრობს. როგორც „ანაკლიის განვითარების კონსორციუმიდან“ იუწყებიან, მათმა კონსორციუმმა აბრეშუმის გზაზე ერთ-ერთი ყველაზე მნიშვნელოვანი ჩინური პორტის ლიენიუნგანგის და მულტინაციონალური კორპორაციის „კოსკო შიფინგ ლაინზის“ მენეჯმენტს უმასპინძლა და მათთან მოლაპარაკებები გამართა.

„კოსკო შიპინგ ლაინზის“ წარმომადგენლები ამჯერად ანაკლიაში იმყოფებიან, სადაც პორტის ტერიტორიას და შესრულებულ სამუშაოებს დეტალურად ეცნობიან.

„ანაკლიის განვითარების კონსორციუმმა“ და ლიენიუნგანგის პორტმა კი ურთიერთთანამშრომლობის მემორანდუმი გააფორმეს. დოკუმენტს ხელი მოაწერეს

კონსორციუმის გენერალურმა დირექტორმა ლევან ახვლედიანმა და ლიენიუნგანგის პორტის ჰოლდინგის პრეზიდენტმა ჭუ სიანგიანმა.

ლიენიუნგანგის პორტი აღმოსავლეთ ჩინეთში მდებარეობს და ის ქვეყნის ერთ-ერთი მსხვილი სავაჭრო და სამრეწველო ცენტრია. 2020 წლისთვის ლიენიუანგანის პორტში საკონტეინერო ტვირთნაკადის 120 მილიონ ტონამდე ზრდას ელიან.

„ანაკლია მნიშვნელოვან როლს ითამაშებს რეგიონში ტვირთნაკადის გაზრდის მიმართულებით. პორტ ლიენიუნგანგისთვის იგი მნიშვნელოვანი პარტნიორი იქნება და ჩვენ თანამშრომლობის დიდი სურვილით ჩამოვედით. გადავწყვიტეთ, ჩამოვაყალიბოთ ორივე მხარის წარმომადგენლებით დაკომპლექტებული სამუშაო ჯგუფი, რომელიც განსაზღვრავს პორტებს შორის სამომავლო პარტნიორობის შესაძლებლობებს. ლიენიუნგანგი ასევე აკვირდება ანაკლიაში თავისუფალი ეკონომიკური ზონის განვითარებას“, - განაცხადა შეხვედრაზე ლიენიუნგანგის პორტის პრეზიდენტმა ჭუ სიანგიანმა.

„ანაკლიის განვითარების კონსორციუმმა“ პროექტის დეტალები გააცნო და მოლაპარაკებები გამართა „კოსკო შიფინგ ლაინზის“ მენეჯმენტის ჯგუფთანაც, რომელსაც კონსორციუმის დირექტორი ლევან ახვლედიანი ანაკლიის პორტის ტერიტორიაზე მასპინძლობს. „კოსკო შიფინგ ლაინზი“, რომლის სათავო ოფისიც შანხაიში მდებარეობს, საკონტეინერო გადაზიდვებსა და მასთან დაკავშირებულ სერვისებზე სპეციალიზდება. 2017 წელს კომპანიის სერვისებმა 355 მარშრუტი და 267 პორტი მოიცვა და მისი გამტარუნარიანობა 1 800 000 TEU-ს შეადგენდა.

ჩინეთის სახალხო რესპუბლიკიდან საქართველოში ვიზიტით მყოფ დელეგაციას საქართველოს ეკონიმიკისა და მდგრადი განვითარების მინისტრმა დიმიტრი ქუმსიშვილმაც უმასპინძლა და ქვეყნის ინფრასტრუქტურული და ეკონომიკური პოტენციალი დეტალურად გააცნო. შეხვედრაზე მინისტრის მხრიდან ხაზი გაესვა ანაკლიის ღრმაწყლოვანი პორტის მნიშვნელობას შუა დერეფნის განვითარებისათვის.