ISET - სოფლის მეურნეობის პროდუქციის გამოშვება 2.1%-ით შემცირდა

2017 წელს, წინა წელთან შედარებით, სოფლის მეურნეობის პროდუქციის გამოშვება 2.1%-ით არის შემცირებული.ამის შესახებ ინფორმაცია აისეტის კვლევითი ცენტრის ანგარიშშია მოცემული.

მათივე ცნობით, წინა წელთან შედარებით, მემცენარეობაში 0.4%-იანი, მეცხოველეობაში კი 3.8%-იანი კლება ფიქსირდება. წარმოების დონის შემცირება აისახა თვითუზრუნველყოფის კოეფიცინტებზე, რომელთა უმეტესობაც ასევე შემცირებულია.

„სასოფლო-სამეურნეო პროდუქტების რეალიზაციიდან მიღებული შემოსავლები 2017 წელს 2014-2016 წლების მონაცემებთან შედარებით შემცირებულია, როგორც პროცენტული, ისე აბსოლუტური მნიშვნელობით. ეს შეიძლება აიხსნას იმით, რომ წარმოების დონის შემცირებამ გაყიდვების შემცირებაც გამოიწვია.

მიუხედავად იმისა, რომ სოფლის მეურნეობიდან მიღებული შემოსავლები ერთ შინამეურნეობაზე შემცირებულია, შეიძლება ვივარაუდოთ, რომ კომერციალიზაციის დონე სექტორში იზრდება. ეს ტრენდი განსაკუთრებით აქტუალურია მეცხოველეობაში, სადაც ბოლო ოთხი წლის განმავლობაში საწარმოების წილი 21%-დან 27%-მდე გაიზარდა. მემცენარეობაშიც 2017 წელს, 2016 წელთან შედარებით, გაიზარდა საწარმოების წილი, თუმცა სტაბილური ტრენდი აქ არ შეინიშნება,“-ნათქვამია ანგარიშში.

რაც შეეხება ფასებს, „აისეტის“ ცნობით, 2018 წლის მაისში სურსათისა და უალკოჰოლო სასმელების ჯგუფზე ფასები წინა თვესთან შედარებით, 0.7%-ით შემცირდა, წინა წლის მაისთან შედარებით კი პირიქით, 1.8%-ით გაიზარდა.

„2018 წლის მაისში წინა წლის მაისთან შედარებით, ზეთისა და ცხიმის ქვეჯგუფში შემავალი პროდუქტების ფასები 4.6%-ით გაიზარდა. განსაკუთრებით აღსანიშნავია კარაქის ფასის ზრდა. რაც შეიძლება „რძისა და რძის ნაწარმის შესახებ ტექნიკურ რეგლამენტში“ ცვლილებებით იყოს გამოწვეული.

რაც შეეხება ევროკავშირთან და დსთ-ის წევრ ქვეყნებთან ვაჭრობას, 2016 წელს, წინა წელთან შედარებით, ექსპორტი ევროკავშირში 5%-ით გაიზარდა, თუმცა 2017 წელს 38%-იანი კლება დაფიქსირდა, რაც თხილის ექსპორტის შემცირებით არის გამოწვეული. დსთ-ის წევრ ქვეყნებში, საქართველოს სოფლის მეურნეობის პროდუქტების ექსპორტი ბოლო წლების განმავლობაში მზარდი იყო. რაც შეეხება იმპორტს, განსხვავებით ექსპორტისგან, როგორც ევროკავშირთან, ისე დსთ-ის ქვეყნებთან ვაჭრობისას, ბოლო წლების განმავლობაში იმპორტში მნიშვნელოვანი ცვლილებები არ შეინიშნება,“-აღნიშნულია ინფორმაციაში.