2018 წელს „ტოიოტას“ ევროპული გაყიდვების ნახევარი ჰიბრიდებზე მოდის

„ტოიოტა მოტორ იუროპმა“ გამოაცხადა, რომ წლის პირველ ნახევარში, მისი გაყიდვები მნიშვნელოვნად გაიზარდა.

იაპონურმა კომპანიამ ექვს თვეში ჯამში დაახლოებით 560 000 ავტომობილი გაჰყიდა, რაც წინა წლის პირველი ექვსი თვის მაჩვენებელზე 6 პროცენტით მეტია. საერთო ჯამში, „ტოიოტას“ წილი ევროპულ ბაზარზე 5 პროცენტამდე გაიზარდა.

ყველაზე მეტად, „ტოიოტას“ ჰიბრიდული მოდელების გაყიდვებია გაზრდილი. უფრო მეტიც, მათზე უკვე ჯამური გაყიდვების თითქმის ნახევარი - 257 000 ეგზემპლარი მოდის. ჰიბრიდების გაყიდვები, გასულ წელთან შედარებით, 23 პროცენტით არის გაზრდილი.

„ტოიოტას“ ჯგუფის პრემიუმ ბრენდ „ლექსუსის“ გაყიდვები 7 პროცენტით არის გაზრდილი. ამასთან, ევროპაში მისი გაყიდვების თითქმის 62 პროცენტი ჰიბრიდბზე მოდის, დასავლეთ ევროპის ქვეყნებში კი ჰიბრიდული ავტომობილების წილი 99 პროცენტს აღწევს.

ძველ კონტინენტზე „ტოიოტას“ მოდელებიდან ყველაზე უკეთ სუბკომპაქტური „იარისი“ იყიდება, რომელიც 123 266 ცალი გაიყიდა. მათგან 66 306 ცალი ჰიბრიდულია. ასევე კარგად იყიდება ქროსოვერი C-HR, რომელიც 78 369 ცალია გაყიდული. მათგან 67 194 ჰიბრიდული ძალური დანადგარითაა აღჭურვილი.

„ლექსუსის“ ყველაზე პოპულარული ავტომობილია ქროსოვერი NX, რომელიც 15 365 ცალი გაიყიდა. მათგან 10 755 ჰიბრიდული ვერსიაა.