ფოთში სტიქიისგან მიყენებულ ზარალის ოდენობას სპეციალური კომისია დაადგენს
ფოთში სპეციალური კომისია შეიქმნება, რომელიც სტიქიის შედეგად მიყენებული ზარალის ოდენობას დაადგენს.ფოთის მერი გოჩა კურდღელია ვითარებას ადგილზე ეცნობა და დაზარალებულ მოსახლეობას ხვდება.
„ამ წუთებში ქალაქში არსებული რვავე სატუმბი სადგური გამართულად მუშაობს“, - განუცხადა ჟურნალისტებს ფოთის მერმა გოჩა კურდღელიამ.
მისი ინფორმაციით, ელექტროენერგიის გათიშვამ სატუმბი სადგურების მუშაობა შეაფერხა.
„ქალაქში უხვი ნალექი დაფიქსირდა. გაითიშა ელექტროენერგია, რამაც სატუმბი სადგურების გაჩერება გამოიწვია და დაიტბორა ქუჩები. შეიქმნება სპეციალური კომისია, რომელიც ზარალს დაითვლის და დაზარალებულებს შესაბამისი დახმარება გაეწევათ“, - განაცხადა გოჩა კურდღელიამ.
ფოთში ძლიერი წვიმის შედეგად ქალაქის რამდენიმე ქუჩა დაიტბორა. წყალმა საცხოვრებელი სახლების პირველ სართულებზე შეაღწია. ათობით ოჯახს საყოფაცხოვრებო ტექნიკა და ავეჯი გაუნადგურდა.