„რეზონანსი" - „ხრუშჩოვკებით" ერთი ინვესტორიც კი არ დაინტერესებულა

საბჭოთა ეპოქის ბინების, ე. წ. „ხრუშჩოვკების" ჩანაცვლების მცდელობა ჯერჯერობით უშედეგოა.სპეციალისტები ფიქრობენ, რომ ნაჩქარევად მომზადებულმა პროექტმა, რომელსაც ეკონომიკური გათვლა დააკლდა, ინვესტორები ვერ დააინტერესა. როგორც გაზეთი „რეზონანსი" წერს,  მერიამ ნამდვილად ხელსაყრელი პირობები წამოაყენა, მაგრამ ძველი 5-სართულიანი კორპუსებისადმი ყველა გულგრილია.

ურბანისტებს ეჭვი არ ეპარებათ, რომ სამომავლოდ ბიზნესი „ხრუშჩოვკების" პროექტით დაინტერესდება და ამ მხრივ მერიის მორიგი მცდელობა შედეგს მოიტანს. ჯერჯერობით კი, როგორც გუშინ გახდა ცნობილი, თბილისის მერიის მიერ გამოცხადებულ ინტერესთა გამოხატვაში მონაწილეობა არავის მიიუღია.

კონკურსი 15 აგვისტოს დასრულდა. აღნიშნულ პროექტზე დედაქალაქის მერია ინტერესთა გამოხატვის გამოცხადებას ახლიდან აპირებს. არსებული ინფორმაციით, ტერიტორიის ფართობი 30 205 კვ/მ-ს მოიცავს, რომელსაც მერია კომპანიას სიმბოლურ ფასად – 1 ლარად გადასცემს, პროექტის დასრულების შემდეგ კი კომპანიამ თბილისის მერიას, მინიმუმ, 7 500 კვ/მ ფართობი უსასყიდლოდ უნდა გადასცეს.

კომპანიის ვალდებულებაა, მისთვის გადაცემულ ტერიტორიაზე მოაწყოს საზოგადოებრივი სივრცეები - სპორტული მოედანი, ვერტიკალური გამწვანება, სარეკრეაციო ზონა, ავტოსადგომი, შიდა გზები და ა. შ.

გამარჯვებული ვალდებულია, მშენებლობის ნებართვის გაცემიდან 2 წლის ვადაში დაასრულოს საცხოვრებელი ბინის მშენებლობა და მიიღოს ექსპლუატაციაში.

რაც შეეხება თბილისის მიწათსარგებლობის გენგეგმას და „ხრუშჩოვკების" პროექტის მასთან შესაბამისობას, ამის შესახებ „ბიზნეს-რეზონანსს" „სითი ინსტიტუტის" დირექტორი მამუკა სალუქძაძე ესაუბრა. მისი აზრით, მთავარია, პროექტი თავიდან შემუშავდეს საფუძვლიანი კვლევის საფუძველზე, სადაც მერიის შეთავაზება ბიზნესისთვის გაცილებით გასაგები გახდება და ეკონომიკური გათვლა – უფრო დასაბუთებული.

„პროექტი ინტერესს ნამდვილად გამოიწვევს, გააჩნია, რამდენად სწორად იქნება ბიზნესისთვის შეთავაზება წარდგენილი. ამ მხრივ კიდევ იქნება წინადადებები, რაც ჩარჩო-გეგმის სახით მომზადდება. ჯერჯერობით ასეთი გეგმა ვარკეთილის მესამე მიკრორაიონისთვის არსებობს. ველოდები, რომ მოხდება გარკვეული საკითხების შესწავლა და უფრო დეტალურად იქნება ბიზნესისთვის საინვესტიციო წინადადებები წარდგენილი, ვიდრე შეიძლება დღეს იყოს ნაჩქარევად შეთავაზებული. შესაძლოა, დასაბუთება და ეკონომიკური გათვლაც აკლდა პროექტს, რის გამოც ბიზნესმა ინტერესი არ გამოავლინა.

მუშაობა გასააქტიურებელია, რათა ინვესტორებმა იგრძნონ მათთვის მომგებიანი წინადადება. ვარკეთილთან დაკავშირებით პროექტი, როგორც სამოდელო, ისე შეიძლება გაკეთდეს. გვაქვს ინფორმაცია, რომ იქ ბევრი „ხრუშჩოვკა" დაიშლება და მათ ადგილზე ახალი განაშენიანება წავა. გენგეგმა იძლევა საშუალებას, რომ ამ საკითხზე უფრო დეტალური სურათი გვქონდეს", - აცხადებს სალუქვაძე.

მისი თქმით, ძალიან მნიშვნელოვანი ფაქტორია, რომ მერიამ დეველოპერებს თამაშის წესები თავად დაუწესოს, რაც შეიძლება მშენებლობისთვის ტერიტორიების შეზღუდვას უკავშირდებოდეს.

„მერია დეველოპერებს თავად უნდა კარნახობდეს თამაშის წესებს და არა პირიქით. აქამდე თავისუფალ ტერიტორიებზე მშენებლობა შეუზღუდავად ხდებოდა. ცხადია, ეს უფრო მომგებიანია, ვიდრე, ვთქვათ, კორპუსების დანგრევა, ახლის შენება და მობინადრეების დაკმაყოფილება.

ქალაქის სწორად განვითარებისთვის გარკვეული შეზღუდვა იარსებებს. საბოლოოდ ველოდები, რომ ინტერესი გაჩნდება. როცა დეველოპერებს არ ექნებათ საშუალება, რომ აშენონ ყველგან, სადაც მოესურვებათ, სამაგიეროდ, ახალ ტერიტორიებს შესთავაზებენ, მოუწევთ გარკვეულ საკითხებში თანხმობა, როგორიც ამ ეტაპზე "ხრუშჩოვკების" პროექტში მონაწილეობაა", - განუცხადა „ბიზნეს-რეზონანსს" სალუქვაძემ.

რაც შეეხება ბიზნესის დამოკიდებულებას პროექტის მიმართ, ორიოდე თვის წინ ქონების მართვის სააგენტოს ხელმძღვანელი ირაკლი თავართქილაძე ფიქრობდა, რომ დიდი ინტერესი იქნებოდა, რამდენადაც ინვესტორს მერია საკმაოდ მიმზიდველ პირობებს სთავაზობდა, რაც ორივე მხარისთვის მისაღები უნდა ყოფილიყო.

„ჩვენი პრიორიტეტია, რომ თბილისელებისთვის უსაფრთხო გავხადოთ გარემო, რომელშიც ცხოვრობენ. ყველა უბანს თავისი მიდგომა სჭირდება როგორც ინვესტორის შერჩევის, ასევე პროექტის სისრულეში მოყვანის მხრივ. სპეციალურად გამოიყოფა მიწის ნაკვეთები, რომლებსაც თბილისის მერია კომპანიებს სიმბოლურ ფასად, 1 ლარად შესთავაზებს, ხოლო მშენებლობის დასრულების შემდეგ მშენებელი გადმოგვცემს კონკრეტულ ფართს, რომელიც სამომავლოდ "ხრუშჩოვკების" ყოფილ მობინადრეებს დაუკანონდებათ.

მნიშვნელოვანია, რომ ინვესტორმა საბანკო გარანტია წარმოადგინოს, რაც გვაძლევს საშუალებას, რომ ფინანსურად მყარი კომპანია შეირჩეს. შესაბამისად, თუ ინვესტორი ვერ განახორციელებს პროექტს, ჩვენ შეგვეძლება, რომ ამ ხალხს ნაკისრი ვალდებულება უკვე ფულადი სახით გავუსტუმროთ.

ინვესტორებს მერიის მხრიდან ხელშეწყობა ექნებათ. ცხადია, ეს მოხდება კანონის ფარგლებში და ჩვენი ინტერესების მაქსიმალური გათვალისწინებით. საბოლოოდ კი გამარჯვეუბული იმის მიხედვით გამოვლინდება, ვინც უფრო დიდ ფართს გადმოსცემს მუნიციპალიტეტს", - აღნიშნავდა ირაკლი თავართქილაძე პროექტთან დაკავშირებით.

დღეს კი სპეციალისტები იმასაც ამბობენ, რომ ე. წ. „ხრუშჩოვკების" ჩანაცვლება ძალიან ძვირადღირებული პროექტია და ძნელი წარმოსადგენია, რომ ამით ინვესტორები დაინტერესდნენ თუნდაც იმიტომ, რომ ეს სახლები არის მრავალბინიანი და მცხოვრებლების დაკმაყოფილების შემდეგ კომპანია ვერც მშენებლობის თვითღირებულებას დაფარავს და მოგებაზე ლაპარაკიც კი ზედმეტი იქნება.

არაოფიციალური მონაცემით, თბილისში 4-5-სართულიანი დაახლოებით 512 „ხრუშჩოვკაა", სადაც 12 ათასი ოჯახი ცხოვრობს და მათ დაახლოებით 600 ათასი კვადრატული მეტრი ფართი უკავიათ. ეს შენობები ძირითადად ვაჟა-ფშაველას კვარტალებში, ვარკეთილში, ნავთლუღში, დიღომსა და კრწანისშია განთავსებული.

მარიკა გოგოხია

გაზეთი „რეზონანსი"