ალეკო ელისაშვილი "სითი პარკთან" კონტრაქტის გაუქმების ინიციატივით გამოდის

თბილისის საკრებულოს საბურთალოს მაჟორიტარი დეპუტატობის კანდიდატი ალეკო ელისაშვილი კომპანია "სითი პარკთან" კონტრაქტის გაუქმების ინიციატივით გამოდის.

როგორც ალეკო ელისაშვილმა ტელეკომპანია "იმედზე", გადაცემაში "პოლიტიკის დრო" საუბრისას განაცხადა, უნდა გამოიძიონ, სად მიდიოდა უზარმაზარი თანხა, რომელიც კომპანიას ბიუჯეტში უნდა შეეტანა.

"2007 წლის 5 დეკემბრიდან აქვს კონტრაქტი გაფორმებული ქალაქს "სითი პარკთან", ამ ბანდიტურ ორგანიზაციასთან. შვიდი წელია ძარცვავენ მძღოლებს. "სითი პარკთან" კონტრაქტი უნდა გაწყდეს. უნდა გამოვიძიოთ, სად მიდიოდა უზარმაზარი თანხა, რომელიც მათ ბიუჯეტში უნდა შეეტანათ. კონკრეტულ ციფრს გეტყვით, 400 000 მანქანაა თბილისში, 50 ლარს მარტო მოსაკრებელს იხდის ყოველ წელს ყველა მძღოლი, 20 მილიონი მარტო მოსაკრებლიდან არის, პლუს 15 მილიონი ჯარიმებიდან. მხოლოდ 1 200 000 შეაქვთ თბილისის ბიუჯეტში, შვიდი წელია. დანარჩენი, 34 მილიონი სადღაც, ვიღაცეების ჯიბეში მიდის. აი, ის ჯიბეებია შესამოწმებელი", - აღნიშნა ალეკო ელისაშვილმა.

ამასთან, მაჟორიტარობის კანდიდატმა კიდევ ერთ ინიციატივაზე ისაუბრა, რომლის თანახმადაც, თბილისის საკრებულოში პერსონალური ავტომობილი არავის უნდა ჰყავდეს.