„მევენახეებსა და მწარმოებლებს შორის მოლაპარაკება შედგა - რაჭაში რთველი ისევე წარმატებულად ჩატარდება, როგორც წინა წლებში“
მევენახეებსა და მწარმოებლებს შორის მოლაპარაკება შედგა, - ამის შესახებ გარემოს დაცვისა და სოფლის მეურნეობის მინისტრმა ლევან დავითაშვილმა ამბროლაურში მევენახეებთან შეხვედრის დასრულების შემდეგ განაცხადა. მისივე თქმით, მიუღებელია აღნიშნული პროცესის პოლიტიზირება.
„მევენახეებსა და მწარმოებლებს შორის მოლაპარაკება შედგა. ეს, რა თქმა უნდა, გარდაუვალიც იყო, რადგან საბაზრო კონიუქტურა დამაიმედებელია. რთველი რაჭაში ისევე წარმატებულად ჩატარდება, როგორც წინა წლებში და როგორც მთელ დანარჩენ საქართველოში. ჩვენთვის უბრალოდ აღმაშფოთებელი და მიუღებელია პროცესის პოლიტიზირება, იმ ადამიანების გრძნობების გამოყენება, ვინც მთელი წელი შრომობს, მათ შორის, ჩვენი მევენახეებისთვის და ფერმერებისთვის. ბევრი პოლიტიკოსი, სამწუხაროდ, ამას სათავისოდ, სუბიექტურად იყენებს და ხშირ შემთხვევაში, ეს პროცესების სწორად წარმართვას ხელს უშლის“, - განაცხადა დავითაშვილმა.
შეგახსენებთ, რომ ამბროლაურში მევენახეები ყურძნის ჩაბარებაზე უარს აცხადებდნენ და ამის მიზეზად დაბალ ფასს ასახელებდნენ.