საქართველოს სავაჭრო-სამრეწველო პალატამ ახალი კამპანია - „გაეცანი წარმოებას“ დაიწყო
საქართველოს სავაჭრო-სამრეწველო პალატამ კამპანია „გაეცანი წარმოებას“ დაიწყო.კამპანიის ფარგლებში, პირველი რეგიონული გასვლა იმერეთის რეგიონში შედგა. საქართველოს სავაჭრო-სამრეწველო პალატის პრეზიდენტი ნინო ჩიქოვანი ქუთაისში მდებარე საწარმო „ემჯიემტექსს“ ესტუმრა. პალატის პრეზიდენტი წარმოების პროცესს ადგილზე გაეცნო.
სავაჭრო-სამრეწველო პალატის ინფორმაციით, „ემჯიემტექსი“ ტექსტილისა და ტანისამოსის მწარმოებელი ქარხანაა, რომელსაც საკუთარი ნაწარმი ექსპორტზე რამდენიმე ქვეყანაში გააქვს. მათ შორის, დიდ ბრიტანეთში, გერმანიაში, რუმინეთში, იტალიასა და ავსტრიაში. საწარმოში ამ ეტაპზე 250 ადგილობრივი მოსახლეა დასაქმებული.
კამპანიის „გაეცანი წარმოებას“ ძირითადი მიზანი ადგილობრივი პროდუქციის პოპულარიზაცია და საქართველოში მოქმედი საწარმოების საქმიანობის საზოგადოებისთვის გაცნობაა. სავაჭრო-სამრეწველო პალატის წარმომადგენლები კამპანიის ფარგლებში წარმოების პროცესს ადგილზე დაათვალიერებენ და საქართველოს სხვადასხვა რეგიონების ბიზნეს-სექტორისთვის აქტუალური პრობლემატიკის შესახებ ინფორმაციას გაეცნობიან. კამპანიის ფარგლებში დაგეგმილია საწარმოების დათვალიერება ქვეყნის ყველა რეგიონში.