2018 წელს მილიარდერების ქონება დღეში 2,5 მლრდ დოლარით იზრდებოდა - რა ქონებას ფლობენ მსოფლიოს უმდიდრესი ადამიანები
ბოლო 10 წელიწადში მსოფლიოში მილიარდერთა რაოდენობა გაორმაგდა.
Oxfam International-ის ახალი კვლევის მიხედვით, მსოფლიოს ყველაზე მდიდარი 26 მილიარდერი იმდენივე ქონებას ფლობს, რასაც პლანეტის ღარიბი მოსახლეობის ნახევარი, ანუ 3.8 მილიარდი ადამიანი.
კვლევის მიხედვით, მსოფლიო მასშტაბით 2 200-ზე მეტი მილიარდერი ცხოვრობს. 2018 წელს მათი ქონება საერთო ჯამში 900 მილიარდი დოლარით გაიზარდა. გამოდის, რომ მილიარდერების ქონება დღეში 2.5 მილიარდით იზრდებოდა.
მსოფლიოს ყველაზე მდიდრების ქონება 12%-ით გაიზარდა, მაშინ, როდესაც პლანეტის ღარიბი მოსახლეობის ნახევრის ქონება 11%-ით შემცირდა.
კვლევის მიხედვით დადგინდა:
- ბოლო 10 წლის განმავლობაში მილიარდერთა რაოდენობა გაორმაგდა
- 2017-2018 წლებში მსოფლიოში ყოველ მეორე დღეს ახალი მილიარდერი ჩნდებოდა
- მსოფლიოს უმდიდრესმა ადამიანმა, „ამაზონის“ დამფუძნებლმა ჯეფ ბეზოსმა ქონება 112 მილიარდამდე გაზარდა. მისი ქონების მხოლოდ 1% ეთიოპიის ჯანდაცვის ბიუჯეტს უტოლდება. ქვეყანაში 105 მილიონი ადამიანი ცხოვრობს.
ანგარიშში ნათქვამია, რომ ყოველწლიურად ხელმისაწვდომი ჯანდაცვის არქონის გამო 10 ათასი ადამიანი იღუპება. ხოლო 262 მილიონი ბავშვი სკოლაში მხოლოდ იმის გამო არ დადის, რომ მშობლებმა მისთვის უნიფორმისა და სახელმძღვანელოების შეძენა ვერ შეძლეს.
