თბილისში booking.com-ზე დარეგისტრირებული სასტუმროების რაოდენობა 46%-ით გაიზარდა
თბილისში, ბოლო ერთი წლის განმავლობაში, booking.com-ზე დარეგისტრირებული 3, 4 და 5-ვარსკვლავიანი სასტუმროების რაოდენობა 46%-ით გაიზარდა. ამის შესახებ ორგანიზაცია PMCG-ის კვლევაშია ნათქვამი.
მათივე ინფორმაციით, 2018 წლის დეკემბერში, 2017 წლის ანალოგიურ პერიოდთან შედარებით, საქართველოში სასტუმროების ფასების ინდექსი 1%-ით გაიზარდა.
რაც შეეხება კონკრეტულად თბილისს, 2018 წლის დეკემბერში, 2018 წლის ნოემბერთან შედარებით, სასტუმროს ფასები 11.9%-ით გაიზარდა, ამასთან, საოჯახო ტიპის სასტუმროების ფასების ზრდის ტემპი (21%) მნიშვნელოვნად აღემატება 3, 4 და 5-ვარსკვლავიანი სასტუმროს ფასების ზრდის ტემპს (9.3%).
„აღნიშნული დინამიკა განსხვავდება გასული წლის ანალოგიური პერიოდის დინამიკისგან, როდესაც თბილისში სასტუმროს ფასები 12.5%-ით იყო გაზრდილი, 3, 4 და 5 ვარსკვლავიანი სასტუმროების ფასების ზრდა 15.1%-ს, ხოლო საოჯახო ტიპის სასტუმროების ფასების ზრდა მხოლოდ 3.6%-ს შეადგენდა.
2018 წლის დეკემბერში, 2017 წლის დეკემბერთან შედარებით, საქართველოში სასტუმროების ფასების ინდექსი 1%-ით გაიზარდა. რეგიონების მიხედვით, სასტუმროს ფასები ყველაზე მეტად აჭარაში (21.1%) და სამცხე-ჯავახეთში (14.8%) გაიზარდა. ხოლო თბილისში სასტუმროს ფასები 9.8%-ით არის შემცირებული. აღნიშნული შემცირება ძირითადად გამოწვეულია 3, 4 და 5-ვარსკვლავიანი სასტუმროების ფასების კლებით. მაშინ როდესაც თბილისში 3, 4 და 5-ვარსკვლავიანი სასტუმროს ფასები 14.7%-ით არის შემცირებული, ხოლო საოჯახო ტიპის სასტუმროების ფასები 9%-ით არის გაზრდილი.
აღსანიშნავია, რომ თბილისში ბოლო ერთი წლის განმავლობაში booking.com-ზე დარეგისტრირებული 3, 4 და 5-ვარსკვლავიანი სასტუმროების რაოდენობა 46%-ით გაიზარდა, მაშინ როდესაც საოჯახო ტიპის სასტუმროების რაოდენობა 19.1%-ით არის გაზრდილი“,-აღნიშნულია ორგანიზაციის კვლევაში.
