თბილისში საინფორმაციო ბანერები განთავსდა, რომელთა მეშვეობითაც მოსახლეობას ნარჩენების დახარისხებისკენ მოუწოდებენ
თბილისის მერიის მხარდაჭერით, „კავკასიის გარემოსდაცვითი არასამთავრობო ორგანიზაციების ქსელმა“ (CENN) დედაქალაქში, ნარჩენების სეპარაციის შესახებ საინფორმაციო ბანერები განათავსა.
ამის შესახებ თბილისის მერიიდან იუწყებიან.
მათივე ცნობით, საინფორმაციო ბანერებზე მითითებულია თუ რა მისამართებზეა განლაგებული ნარჩენების სეპარირების სტენდები.
„ნარჩენების სეპარაციის სტენდები, თბილისის მერიის, "თბილსერვის ჯგუფის", „კავკასიის გარემოსდაცვითი არასამთავრობო ორგანიზაციების ქსელის“ (CENN) და საქართველოს ნარჩენების მართვის ასოციაციის ერთობლივი ძალისხმევით შეიქმნა.
დედაქალაქში უკვე სეპარაციის 25 სტენდი დგას, რომელშიც მოქალაქეებს დახარისხებული ნარჩენების განთავსება შეუძლიათ. კერძოდ, PET ბოთლები, ქაღალდი, შუშა და ალუმინის ქილები“, - ნათქვამია თბილისის მერიის მიერ გავრცელებულ ინფორმაციაში.
მათივე განცხადებით, ამ სტენდებში მოხვედრილი ნარჩენები მეორად პროდუქტად გადამუშავდება.
რაც შეეხება საინფორმაციო ბანერებს, თბილისის მერიის ინფორმაციით, ისინი განთავსებულია მეტროსადგურ „სამგორთან“, დიდ დიღომში, გ. ბრწყინვალეს ქუჩაზე, ვაჟა-ფშაველას გამზირზე; რესპუბლიკური საავადმყოფოს მიმდებარედ, წერეთლის გამზირზე, "კოკა-კოლას" ოფისთან, ვაკის პარკთან და მეტროსადგურ "ღრმაღელესთან". ბანერებიდან რამდენიმე წუთის სავალზეა განთავსებული სეპარაციის სტენდებიც.