ტაქსების პარკირების ადგილას სხვა მანქანის გაჩერებაზე ჯარიმა შესაძლოა, ხუთჯერ გაიზარდოს

ტაქსების პარკირების ადგილას სხვა მანქანის გაჩერებაზე ჯარიმა შესაძლოა, ხუთჯერ გაიზარდოს.

ამის შესახებ, მერიის ტრანსპორტის საქალაქო სამსახურის უფროსმა მამუკა მუმლაძემ რადიო „პალიტრას“ გადაცემაში „საქმე“ განაცხადა. მისივე თქმით, ამ მხრივ რეგულირება გამკაცრდება და ჯარიმა 10 ლარის ნაცვლად 50 ლარი გახდება.

„ტაქსისტებს არ ჰქონდათ კუთვნილი ადგილები და სხვადასხვა ადგილების გამოყენება უწევდათ. ჩვენ შევქმენით უფასო ტაქსის ადგილები, მონიშვნაც გაკეთდა ამისთვის, თუმცა არასაკმარისი სივრცეების გამო სხვა ადამიანებმაც დაიწყეს ამ ადგილების გამოყენება. მართალია, ამ ნაწილში გავაქტიურდით, თუმცა ეფექტური არ იყო და ვფიქრობთ, რომ ჯარიმები გაიზარდოს. დღეის მდგომარეობით, ფულადი სანქცია 10 ლარია და 50 ლარამდე უნდა გაიზარდოს. შესაბამისად, ვინც ტაქსის მონიშვნის ადგილას გააჩერებს ავტომობილს 50 ლარით დაჯარიმდება,“-აღნიშნა მუმლაძემ.