„ეკონომიკის სამინისტრო ინვესტორებს ერთი ფანჯრის პრინციპით მოემსახურება"
საქართველოს ეკონომიკის სამინისტრო ინვესტორებს ერთი ფანჯრის პრინციპით მოემსახურება.
აღნიშნული სიახლე პრემიერ-მინისტრმა მამუკა ბახტაძემ გააჟღერა.
ამასთან, პრემიერის თქმით, ის დღეს ნათია თურნავას მოადგილეებსაც დაამტკიცებს.
„შემოგვაქვს ახალი ძალიან მნიშვნელოვანი მოადგილის შტატი, რომელიც პასუხისმგებელი იქნება ინვესტიციებზე, ზოგადად ინვესტორებთან ურთიერთობაზე, მათ შორის არა მხოლოდ ინვესტიციებამდე პერიოდში, არამედ ინვესტიციების განხორციელების შემდეგ პერიოდში. ეს არის მნიშვნელოვანი სიახლე. ჩვენ რამდენიმე თვე ვმუშაობდით, რომ მიგვეღო ეს შედეგი. ეს მოადგილე იქნება პასუხისმგებელი ასევე კოორდინაციაზე სხვა უწყებებთან, ვინაიდან ინვესტორებს სხვა უწყებებთანაც უწევთ მუშაობა ბუნებრივია. ჩვენ ამ პრაქტიკას შევზღუდავთ და ეს იქნება ერთი ფანჯრით მომსახურების პრინციპი, სადაც მხოლოდ ეკონომიკის სამინისტრო იქნება პასუხისმგებელი ინვესტორებთან ურთიერთობებზე,“ - განაცხადა პრემიერმა და იქვე აღნიშნა, რომ მნიშვნელოვანი ფოკუსი გაკეთდება თავისუფალი ვაჭრობის რეჟიმზე ევროკავშირთან და მოხდება გამოყოფა იმ პერსპექტიული და პრიორიტეტული მომსახურებებისა და საქონლის ჩამონათვალის, რომელზეც ქვეყანამ მომავალში აქცენტი უნდა გააკეთოს და გაზარდოს მისი სავაჭრო ბრუნვა.