"აზერბაიჯანული კომპანიების წინააღმდეგ კამპანიის აგორების მცდელობა ქვეყნებს შორის არსებულ წარმატებულ ბიზნეს ურთიერთობებს აზიანებს"

ბიზნესომბუდსმენი ირაკლი ლექვინაძე საქართველოში აზერბაიჯანის ბიზნეს ასოციაციის წევრი კომპანიების წარმომადგენლებს შეხვდა. ბიზნესომბუდსმენის აპარატის ცნობით, შეხვედრაზე დავით გარეჯის ირგვლივ განვითარებული მოვლენების შემდეგ, საქართველოში აზერბაიჯანული კომპანიების წინააღმდეგ აგორებულ კამპანია განიხილეს.

მათივე ცნობით, საქართველოში მოღვაწე აზერბაიჯანული კომპანიების წარმომადგენლების თქმით, მათ წინააღმდეგ მიზანმიმართული ცილისმწამებლური კამპანიაა დაწყებული, რაც საფრთხეს უქმნის ქვეყნებს შორის ურთიერთობას და ზიანის მომტანია კომპანიების საქმიანობისთვის. მათივე განცხადებით, ეს ნეგატიურად აისახება საქართველოს ეკონომიკასა და იმ მოქალაქეებზე, ვინც ასოციაციის წევრ და სხვა აზერბაიჯანულ კომპანიებში არიან დასაქმებულები.

„ვხედავთ, რომ სოციალურ ქსელებში აზერბაიჯანული კომპანიების წინააღმდეგ კამპანიის აგორების მცდელობაა. საქართველოში ბევრი აზერბაიჯანელი ინვესტორი წარმატებით ახორციელებს საკუთარ საქმიანობას და დაუშვებელია მსგავსი ტიპის კამპანიები. ამას ნეგატიური გავლენა აქვს აზერბაიჯანული კომპანიების საქმიანობაზე საქართველოში და ამას გარდა, აზიანებს ქვეყნებს შორის არსებულ წარმატებულ ბიზნეს ურთიერთობებს. ბიზნესომბუდსმენის აპარატი მზად არის, კომპეტენციის ფარგლებში, მხარი დაუჭიროს აზერბაიჯანული კომპანიების ბიზნეს საქმიანობას საქართველოში“, - განაცხადა ირაკლი ლექვინაძემ.