რა ცვლილებები განახორციელა სერგი გვარჯალაძემ ღამის ეკონომიკის ფარგლებში

თბილისის მერიის ღამის ეკონომიკის განვითარების პროექტის დაწყებიდან ერთ წელზე მეტი გავიდა. რა ღონისძიებები გაატარა მერიამ ამ ერთი წლის განმავლობაში, რა წინააღმდეგობები აქვს მას და რის გაკეთებას გეგმავენ ავტორები, ამ და სხვა საკითხებზე „ინტერპრესნიუსს“ პროექტის ხელმძღვანელი, სერგი გვარჯალაძე ესაუბრა.

- ერთ წელზე მეტი გავიდა, რაც თბილისის მერიამ ღამის ეკონომიკის პროექტი დააანონსა და დაიწყო. კონკრეტულად რა გაკეთდა პროექტის ფარგლებში ამ ერთი წლის განმავლობაში?

- უპირველეს ყოვლისა, ყველაზე მნიშვნელოვანი არის ის, რომ ჩვენ შევძელით ფოკუსირება კონკრეტულ თემებზე. დაგვიგროვდა გამოცდილება და უკვე კონკრეტულად ვიცით, აქცენტი რაზე უნდა გავაკეთოთ. ვფიქრობ, ამ წლის მანძილზე რა განაცხადიც გავაკეთეთ, მაგალითად, ტრანსპორტის მიმართულებით, ეს საკმაოდ კარგად მუშაობს. ახლა ვაკვირდებით, სხვაგანაც ხომ არ არის საჭირო მსგავსი პროექტის გაშვება. პრინციპმაც გაამართლა, რადგან საპილოტე რეჟიმში წავედით და შევაფასეთ, გავზომეთ და ისე გავუშვით, თან სეზონის გარე პერიოდში. დღეს ვხედავთ, რომ მოთხოვნა არის. არ გვქონდა საშუალება დიდი საკომუნიკაციო კამპანიები დაგვეწყო და ინტერნეტის საშუალებით შევძელით საზოგადოებისთვის გვეცნობებინა ამ სიახლის შესახებ, რომ არსებობს 222 ნომერი ავტობუსი, რომელიც ღამის განმავლობაში დედაქალაქში მოძრაობს.

- თებერვალში გამოქვეყნებული სტატისტიკით, ამ ავტობუსებით დაახლოებით, 40-მდე მგზავრი სარგელობდა. ეს მონაცემი გაძლევთ საფუძველს ავტობუსები დაამატოთ და სხვა მარშრუტების ათვისებაზე იმუშაოთ?

- ზამთართან შედარებით, მგზავრთა რაოდენობა საგრძნობლად გაზრდილია. რასაც ვაკვირდებით, თითო ასვლაზე, თანაც არაცენტრალურ უბნებში 50-60 კაცი მოძრაობს რეგულარულად. გააჩნია საათებსაც, 2-ის ნახევრის მერე ბევრად ნაკლები ხალხი მოძრაობს. ამასთან, გააჩნია იმასაც, რა ღონისძიებებია დაგეგმილი ქალაქში. ეს ყველაფერი დამოკიდებულია იმაზე, რამდენად დიდია აქტივობა. თუ ფესტივალი ტარდება, ან რაიმე ღონისძიებაა, შესაბამისად, მეტი ადამიანი მოძრაობს. საკმაოდ შევსებულია ეს ავტობუსი და ნამდვილად გაამართლა. რაც შეეხება რაიონების დამატებას, მუდმივად გვწერენ, რა დააშავა მაგალითად, ნაძალადევმა და რატომ არ დადის იქ ავტობუსი. ვფიქრობთ, ასეთივე რეჟიმში გავზომავთ რამდენიმე სხვა მიმართულებას დაბალი სეზონურობის პირობებში და პროცენტულად შევადარებთ, სად არის მეტი ტრაფიკი. ამის მიხედვით, ისევ სატესტო რეჟიმში წავალთ. მაგალითად, კუს ტბაზე დაწესებულებები იხსნება და ეს მიმართულებაც საინტერესოა. მაგრამ სირთულე ისაა, რომ იქ დამატებითი ტრანსპორტის ასვლა პრობლემებს შექმნის. ამიტომ ვფიქრობთ, გამოვიყენოთ საბაგირო. თუ ღონისძიებები იქნება და ხალხის რაოდენობაც, ვფიქრობ, ამაზე ფიქრი შეიძლება. ამასთან, ავტობუსს სჯობს იქ შედარებით ეკოლოგიური ტრანსპორტი - ველოსიპედი ან ელექტროტრანსპორტი გამოვიყენოთ. საბაგირო ახლა 22:00 საათამდე მუშაობს, მაგრამ დროის გახანგრძლივებაზე ფიქრი შესაძლებელია. რაც შეეხება ლისს, ისევე აქტიურია, როგორც აქამდე. თუმცა, ლისი მაინც ოჯახური დასვენების ზონაა და იქ დატვირთვა დღის განმავლობაში მეტია, ვიდრე ღამით. OPEN AIR-ზე ისედაც ინიშნება ავტობუსები. გარკვეული სტაბილური ტემპი არის, მაგრამ ჯერჯერობით ვერ ვხედავთ განსკუთრებულ ახალ ღონისძიებებს და ამ მიმართულებით სხვადასხვა ჯგუფებთან აქტიურად ვმუშაობთ. ფაქტობრივად, ყოველდღიურ რეჟიმში გვაქვს შეხვედრები ჯგუფებთან და ორგანიზაციებთან. ეს შეხვედრები გაუთვალისწინებელი იყო, მაგრამ ავტომატურად ისე მოხდა, რომ ადამაინები ახალი იდეებით, ახალი ფესტივალებით მოდიან ჩვენთან. დაახლოებით, რომ გადავთვალეთ, 2 თვის წინ 200 შეხვედრა გვქონდა. გვაქვს გარკვეული მიღწევები.

- კონკრეტულად რას მიიჩნევთ მიღწევად და რა გამოწვევები რჩება, რაც ვერ მოაგვარეთ?

- ვფიქრობ, მიღწევა არის ხმაურთან მიმართებაში. მიუხედავად იმისა, რომ მდგომარეობა არც ისე სახარბიელოა ხმაურთან მიმართებაში, ჩვენ შევძელით და დაზარალებულები, რესტორნების და ბიზნესების წარმომადგენლები ერთმანეთს შევახვედრეთ.

- კონკრეტულად როგორ აპირებთ პრობლემის მოგვარებას, როცა სასამართლო პროცესებიც კი მიმდინარეობს ამ ადამიანებს შორის?

- ჩვენ 2-3 თვის წინ დავიწყეთ შეხვედრები, სადაც სამივე მხარე იკრიბება. შუამავალი ვართ ამ შეთხვევაში. ისინი უპირველეს ყოვლისა ერთმანეთს ხედავენ. მეორე ის არის, რომ ორგანიზებულები არიან, ერთი მხრიდან საინიციატივო ჯგუფი „არა ხმაურს“ და მეორე მხრივ ბარების და რესტორნების ასოციაციის წარმომადგენლები. ასევე ჩართულია მუნიციპალური ინსპექციის ჯგუფი. ძალიან მომწონს მათი მიდგომა, რომ ერთ ქალაქში ვცხოვრობთ და საკითხი ბიზნესის და ხალხის დაზარალების გარეშე უნდა მოგვარდეს. ახლა ვართ იმ სტადიაში, რომ არსებობს საკითხების კონკრეტული ჩამონათვალი, რომელიც საბოლოოდ საკანონმდებლო ინიციატივაში უნდა გამოიხატოს.

- კონკრეტულად, რა დარეგულირდება კანონით?

- მაგალითად, დარეგულირდეს არა მხოლოდ ხმაურის დონე, არამედ გამოყენების პრინციპები. უნდა იყოს თუ არა გარე ტერასაზე გამოტანილი მუსიკა, ვის აქვს უფლება ცოცხალი მუსიკა ჰქონდეს ტერასაზე და როდის უნდა მოხდეს ეს. არსებულ კანონში გამოკვეთილია საათები. ასევე ვორქშოფებს ვუკეთებთ ბარებს და რესტორნებს, რომ ყოველგვარი ხარჯის გარეშე როგორ შეძლონ მათ ხმაურის დახშობა. ზოგ შემთხვევაში უბრალოდ კარის მიხურვაა საჭირო, მეტი არაფერი. ასევე მუსიკის ოდნავ დაწევაც კი საკმარისი იქნება, რომ ასეთი ხმაური და ქაოტური სიტუაცია არ შეიქმნას. ზოგიერთი რესტორნის მეპატრონეს რომ ვეკითხებით, ხმას რატომ უწევენ, ამბობენ, რომ მუსიკის ხმით ხალხს ესმის რომ აქ ვართო. ფაქტობრივად, მარკეტინგული ხერხის თვალსაზრისით იყენებენ ხმაურს, რაც ჩემთვის ცოტა უცნაურია. ჩვენი პირველი ნაბიჯია ჰუმანურად მივუდგეთ საკითხს და მოლაპარაკებების მეშვეობით დავალაგოთ ყველაფერი, მაგრამ არის სტადია, როდესაც მოლაპარაკებები ნაკლებად ეფექტურია და საჭირო ხდება რეგულაცია. ვფიქრობ, კანონი დასახვეწია და ამაზე მუშაობა დაწყებულია.

- იზოლაციასთან დაკავშირებით გქონდათ ინიციატივა. ამბობდით, რომ რესტორნებს და ბარებს იზოლაციის გაკეთება დასჭირდებოდათ და ეს ძვირი სიამოვნება არ იყო.

- ეს არის ინდივიდუალურად გადასაჭრელი საკითხი. შეიძლება იზოლაცია არ დასჭირდეს საერთოდ, საკმარისი იყოს მუსიკის დაწევა ან კარის მოხურვა. არის შემთხვევები, როდესაც გეოგრაფიული მდებარეობა აქვს შენობას, სადაც საჭიროა საიზოლაციო სამუშაოების ჩატარება. ხმაურთან დაკავშირებით საინტერესო რაღაც გავაკეთეთ. „ღამის ლაბორატორიას“ რასაც ვეძახით, გავაკეთეთ 8-საათიანი ჰაკათონი, ვუთხარით გამოწვევები, რაც ქალაქს აქვს. ორი გამარჯვებული გვყავდა და ორივე გუნდმა ხმაურის გასაზომი სპეციალური დანადგარები გამოიგონეს, რომლის მეშვეობითაც, მუნიციპალური ინსპექციის ინსპექტორს საერთოდ არ დაჭირდება ხმაურის კერის ადგილზე მისვლა. ეს იქნება დამონტაჟებული შენობასთან და ავტომატურ რეჟიმში გააგზავნის შეტყობინებას, როგორც კი გადააჭარბებს კანონით დადგენილ ნორმას. პირველ ჯერზე შეტყობინება მიუვა რესტორნის, ბარის მეპატრონეს, მისცემს 10 წუთს, თუ რეაგირებას არ ახდენს, მერე მოდის ინსპექციაში სიგნალი. ეს ადგილები დატანილია რუკაზე, რაც ერთი მხრივ, პრევენციის საშუალებას იძლევა, მეორე მხრივ, პირდაპირ გვაქვს სტატისტიკური მონაცემები, სად არის აკუსტიკური დანაგვიანების კერა.

- რამდენი ასეთი ადგილია გამოყოფილი და სად შეიძლება დამონტაჟდეს ეს მოწყობილობები?

- ახლა სტარტაპ რეჟიმშია ორივე კომპანია, გავუშვით ბიზნეს აქსელერატორში. ასევე გვჭირდებოდა აკუსტიკური ექსპერტიზა და ერთ-ერთი აკუსტიკური კომპანია სწავლობს მოწყობილობას. ასევე ბიზნეს აქსელერატორი საშუალებას აძლევს მათ, დარეგისტრირდნენ და ბიზნესად აქციონ ეს საქმე. 30 000-ლარიანი ხელშეწყობა აქვთ კონსულტაციების და სხვა ტიპის მომსახურებებისთვის, რასაც სპარკის ბიზნეს აქსელერატორიდან მიიღებენ, რომ პროფესიონალებთან ერთად პროდუქტი დახვეწონ და საბოლოოდ ისევ ჩვენ ან ბარ-რესტორნების მეპატრონეებს შესთავაზონ. ფაქტობრივად, ფულს დავზოგავთ, რადგან ინსპექტორს არ მოუწევს ადგილზე მისვლა და ბენზინის დახარჯვა. თუ ჩვენ მივაღწიეთ იმას, რომ ხელსაწყოს გამოყენება სერთიფიცირებული იქნება, სასამართლო დავების დროსაც კი შეიძლება მტკიცებულებად გამოვიყენოთ, მოხდა თუ არა კონკრეტული დარღვევა. მოწყობილობას ექნება ხმაურის გაზომვის საშუალება, მაგრამ ის ხმას, რასაკვირველია, არ ჩაწერს. პირველ ვერსიაში როცა პრეზენტაცია გაგვიკეთეს, ერთი ხელსაწყო 120 ლარამდე ჯდებოდა, რაც გაცილებით მომგებიანია, ვიდრე ჯარიმის 500 და 1000 ლარის გადახდა. ასევე ვფიქრობთ, რომ შესაძლოა, ჩვენ თვითონვე შევისყიდოთ დანადგარები და ქალაქში სხვადასხვა ადგილზე დავამონტაჟოთ, რათა რეალურ დროში დავინახოთ, სად რა სიტუაცია გვაქვს ხმაურის თვალსაზრისით. მაქსიმუმ პირველ ეტაპზე შესაძლოა, იყოს 50-100 ხელსაწყო განთავსებული. ძალიან დიდი იმედი მაქვს, რომ ეს გამოვა.

- ერთი წლის წინ, ასევე საუბრობდით იმაზეც, რომ ცოცხალი მუსიკის შესრულებისთვის ბარ-რესტორნები შესაძლოა, ლიცენზირებას დაქვემდებარებოდა. რა სამუშაოს ახორციელებთ ამ მიმართულებით?

- ეს არ გამოდის, რადგან არ გვაქვს საერთოდ რესტორნების და საკონცერტო და მსგავსი ტიპის დაწესებულებების ლიცენზირების რეგულაცია. ზედმეტი რეგულაციებით გართულება რთული იქნება. ხმაურის კანონი რომ დავხვეწოთ, უკვე შედეგებს მივიღებთ. გარკვეულწილად ასევე ვფიქრობთ, რომ ძველ ქალაქში, სადაც ცოცხალი მუსიკა იკვრება, ისევ და ისევ აკუსტიკური თვალსაზრისით უნდა დავაკვირდეთ. რესტორნების მეპატრონეებს ვესაუბრებით, რომ გარკვეული იზოლირება მოხდეს. მუსიკამ არ უნდა შეაწუხოს ხალხი.

- შესაძლოა ბარების გარეთ, ტერასებზე დაკვრა საერთოდ აიკრძალოს?

- ესეც არ არის კანონმდებლობით დარეგულირებული. ყველას შეუძლია დღეს ღია ცის ქვეშ კონცერტი ჩაატაროს და თუ არავინ უჩივლა, ამ კონცერტს ბოლომდე მიიყვანენ. ნაკლები რეგულაციები, რასაკვირველია, ბიზნესს ხელს უწყობს, მაგრამ სამწუხაროდ, ხმაურთან მიმართებაში, მოსახლეობაც და ზოგ შემთხვევაში ბიზნესიც ზარალდება, მაგალითად, სასტუმროები. წკეპლით პრობლემების გადაწყვეტის მომხრე არ ვარ.

- ქუჩის მუსიკოსებთან დაკავშირებით რა ტენდენცია იკვეთება და რა მიმართულებით შეიძლება წახვიდეთ? აღნიშნავდით, რომ მათ დაკვრის უფლების მოსაპოვებლად დოკუმენტი დასჭირდებოდათ. რჩება ძალაში თქვენი ეს მოსაზრება?

- ცივილურ სამყაროში, განვითარებულ ქალაქებში აიღო გიტარა, საქსაფონი და ქუჩაში დაუკრა, ცენტრში, მეტროში და ხალხმრავალ ადგილებში, არ არსებობს. მაგალითად ლონდონში, მუსიკოსი არჩევს რეპერტუარს, უგზავნის CD-ის ადგილობრივ ხელისუფლებას და სთხოვს ნებართვას. ამის შემდეგ ადგილობრივი ხელისუფლება იღებს გადაწყვეტილებას. თუმცა, ამ ეტაპზე ამის გაკეთება ძალიან გაგვირთულდება. არა იმიტომ, რომ არაპრაქტიკული იქნება, ეს ნიშნავს, რომ დამატებითი სამსახური უნდა შევქმნათ, რაც დამატებით ხარჯებს გამოიწვევს. ამიტომ ვცდილობთ ეს ისე გავაკეთოთ, რომ ბიუჯეტის თანხა არ დასჭირდეს და კიდევ ერთი ლიცენზიების ორგანიზაცია არ შევქმნათ. ქუჩის მუსიკოსებთან მიმართებით, ხმაურზე მომართვიანობის რაოდენობა იზრდება. რუსთაველზე ოფიცერთა სახლის წინ არის ერთ-ერთი წერტილი, მოპირდაპირე მხარეს კი თეატრია, სადაც რეპეტიციის საშუალებაც კი არ აქვთ ხმაურის გამო. ყოფილა შემთხვევა, როდესაც გია ყანჩელი გადასულა ამ მუსიკოსებთან უთხოვია რეპეტიცია გვაქვსო და ვერც უცვნიათ. ისევ და ისევ მომხრე ვარ თანაცხოვრების წესები დალაგდეს, თუ არადა, რეგულაციები შესაძლებელია იყოს, თან მკაცრი. არ გვინდა ამ გზით წავიდეთ.

- შარშან ქუჩის მუსიკის ფესტივალი ჩატარდა. წელს თუ იგეგმება მსგავსი ღონისძიება?

- რასაკვირველია, სწორედ ქუჩის მუსიკოსების ხელშესაწყობად, მსგავს ღონისძიებას წელსაც ვგეგმავთ. ისეთ პერიოდში გვინდა ეს ღონისძიება გავაკეთოთ, როდესაც ტურიზმის ვარდნაა. სავარაუდოდ, თბილისობის პერიოდში ჩატარდება.

- მოძრავი კვების ობიექტები თქვენი ერთ-ერთი პრიორიტეტული მიმართულება იყო. რა გაკეთდა ამ ერთი წლის განმავლობაში?

- ჩვენ ვეცადეთ და კონკრეტულ ადგილზე აუქციონი გამოვაცხადეთ ძველ ქალაქში, მაგრამ სამწუხაროდ, არცერთმა პირმა არ გამოთქვა სურვილი. ახლა ვფიქრობთ, წავიდეთ ასეთი გზით - შევისწავლეთ ყველა მოძრავი კვების ობიექტის შესაძლებლობა, ვიცით, რა მდგომარეობაშია ეს ობიექტები, ვის რა მიმართულება აქვს და ა.შ. მოვძებნეთ კონკრეტული ადგილი, რომელიც კერძო მეპატრონემ დაგვითმო ავლაბრის ტერიტორიაზე და გვინდოდა ამუშავება. თუმცა მოძრავი კვების ობიექტების მეპატრონეებთან კომუნიკაციის შედეგად მივხვდით, რომ მათ დროებითი სარგებელი, 2-3 დღით განთავსება არ აინტერესებთ. ახლა ვეძებთ 5-დან 10-მდე ლოკაციას ქალაქში, სადაც ისინი არ შექმნიან ტრანსპორტის თვალსაზრისით პრობლემას და განვათავსებთ. საპილოტე რეჟიმში გვინდა ვცადოდ შეზღუდული რაოდენობის და კონკრეტულ, ტურისტულ ადგილებში ამ ობიექტების განთავსება. თვითონ ოპერატორებმა ზუსტად იციან, სად უნდა დადგნენ და როგორი ადგილი აინტერესებთ. გარკვეული სია შევთავაზეთ, მაგრამ გვითხრეს, რომ მათ იქ ბრუნვა არ ექნებოდათ. გვრჩება კომუნიკაციების მიყვანა და სხვა ტექნიკური საკითხები. ჭასთან აუცილებლად ახლოს უნდა იყვნენ, ესეც ერთ-ერთი კრიტერიუმია, რომლის მიხედვითაც ადგილს ვეძებთ. ქონების მართვის სააგენტომ ასეთი ადგილების მოძებნა წინა კვირას დაიწყო, თუმცა, პროცედურა საკმაოდ გრძელია. როგორც კი ადგილების სია გვექნება, გამოვაქვეყნებთ და გამოვაცხადებთ აუქციონს. შევისწავლით მათ ბრუნვებსაც და ამ პრინციპის მიხედვით შევეცდებით გადავამრავლოთ. პირველ ეტაპზე ტურისტულად დატვირთულ ადგილებს შევარჩევთ. დაახლოებით, 2-3 თვე დაგვჭირდება და იმედი მაქვს, თბილისობისთვის უკვე საკითხი მოგვარებული გვექნება. ასევე გვქონდა იდეა, რომ რამდენიმე ოპერატორმა კლასტერული პრინციპით იმუშაოს, მაგრამ ამაზე არ დაგვთანხმდნენ, მიაჩნიათ, რომ კონკურენცია იქნება, თუმცა, პირადად მე ასე არ ვფიქრობ.

- რაც შეეხება ღამის ეკონომიკის ფორუმს, რა შედეგები მოიტანა ამ ფორუმმა და გეგმავთ თუ არა მსგავსი ღონისძიების ჩატარებას კიდევ?

- ამ ფორუმმა მოგვცა საშუალება, რომ გარკვეული პრიორიტეტები შეგვიცვალა. ჩვენ გავაკეთეთ ფოკუსირება რამდენიმე ძირითად მიმართულებაზე. ერთ მიმართულებას დავარქვით „კომუნიკატორი“, რომელიც გულისხმობს როგორც მოსახლეობასთან კომუნიკაციას, ასევე კომუნიკაციას ე.წ. სტეიკ ჰოლდერებთან. მეორე მიმართულებაა Tbilisi you nigthts, სადაც შევთავაზეთ მერიას ჩვენი ხედვა რაზე უნდა გაკეთდეს აქცენტები ტურიზმის მიმართულებით. აქაც რამდენიმე მიმართულება გამოვყავით. ერთია ის, რომ თბილისი აერთიანებს რეგიონში ახალგაზრდა ადამიანებს. ფაქტია, რომ ჩვენს კლუბებში ვხედავთ ირანელებს, შვედებს, გერმანელებს და თბილისის იმიჯი ამ თვალსაზრისით უფრო უნდა გავაძლიეროთ. ასევე, ჩვენ რეგიონში შეგვიძლია პოზიციონირება და თბილისში დიდი სიმპოზიუმების, კონფერენციების, ფორუმების ჩატარება, ამისთვის სტრატეგიული გადაწყვეტილებაა საჭირო და შენობები უნდა აშენდეს. რამდენიმე ასეთი ობიექტი შენდება ქალაქში საკმაოდ დიდი, ლაბორატორიების ქსელი კეთდება და ყველა რაიონში იქნება ასეთი ცენტრები, სადაც სტარტაპერებს დაეხმარებიან. საშუალება მოგვეცემა დიდი რაოდენობის დარბაზები გვქონდეს, სადაც სიმპოზიუმები, კონფერენციები, ფორუმები ჩატარდება, რაც ტურიზმის თვალსაზრისითაც მნიშვნელოვანია.

- გამოკვლეულია ჩვენი მეზობელი ქვეყნების მდგომარეობა ამ მიმართულებით? თუ რატომ მიიღეთ გადაწყვეტილება თბილისში ასეთი სპეციალური სივრცეები შექმნილიყო, რაც მოგებაზე გაქვთ გათვლილი?

- ჩვენ გამოკვლეული გვაქვს, რომ სტამბოლი არის მზად ასეთი ღონისძიებების ჩატარებისთვის, მაგრამ პოლიტიკური სიტუაციის გამო იქ ტურიზმიც და საქმიანი ვიზიტიც თურქეთისკენ კლებულობს. ამიტომ ჩვენ შეიძლება საინტერესო ქვეყანა გავხდეთ მეზობელი ქვეყნებისთვის. მესამე მიმართულებაა კულინარია, სადაც ბევრი რამ არის გასაკეთებელი და პოზიციონირებაც შეგვიძლია. თუ დააკვირდებით ჩვენი რესტორნების რეპერტუარს, უნიფიცირება ხდება და მენიუები ემსგავსება ერთმანეთს. ძველი, უნიკალური რეცეპტებია გასახსენებელი და ამას პოზიციონირებაც სჭირდება, უნდა მოყვე რომ თბილისი არის ქალაქი, სადაც შეუძლიათ ჩამოვიდნენ და რესტორნების ტური გააკეთონ. აქედან შორს ვართ, მაგრამ რაღაც ეტაპები აუცილებლად გასავლელია. ბოლო მიმართულებაა Night Labs - ღამის ლაბორატორიები. ამის ფარგლებში ჩავატარეთ ჰაკათონი. ახლა ვგეგმავთ რამდენიმე ღონისძიებას და მემორანდუმებიც გაფორმებული გვაქვს START UP ორგანიზაციებთან. ამასთან, “სპარკსი” ანუ ბიზნეს აქსელერატორი მერიის პროექტია, რომელიც ევროგაერთიანების მიერ არის დაფინანსებული და მასთან ვთანამშრომლობთ. ბიზნეს აქსელერატორს ამ დროისთვის 500-მდე მიმართვა აქვს, 500 პროექტზე მუშაობენ. მათთან ერთად გვინდა ჩავატაროთ ჰაკათონი და აქცენტი აპლიკაციებზე გავაკეთოთ, რომელიც ქალაქს სჭირდება. მაგალითად, დღეს ჩვენ არ გვაქვს აპლიკაცია, რომლითაც გაიგებთ სად, რა ხდება დღეს საღამოს. გვინდა მარტივი იყოს ნავიგაცია არა მარტო ტურისტისთვის, არამედ ჩვენთვისაც. ახლა ერთადერთი წყაროა „ფეისბუქ ივენთები“, ამიტომ საჭიროა მსგავსი აპლიკაციის გაკეთება. ვეძებთ ჯგუფს, რომელიც ამას გააკეთებს. თუმცა, ღამის ლაბორატორიების სერია არ არის მხოლოდ ტექნოლოგიური. მაგალითად, ერთი იდეა გვაქვს და სავარაუდოდ, შემოდგომისთვის გავაკეთებთ Foodatron გვინდა დავარქვათ, სადაც დავალებას მივცემთ მონაწილეებს, რომ მოიგონონ ისეთი Street food, რომელიც ღამეც გამოდგება, დღისითად და ბიზნესადაც იქცევა, უნდა ჰქონდეს თავისი ბრენდინგი და რაც ყველაზე მნიშვნელოვანია, ამაში გამარჯვებულებს ჩვენ პირდაპირ ფინანსურ დახმარებას ვთავაზობთ. ვეძებთ სპონსორებსაც.

- იდეა გქონდათ მუზეუმებში კარვების გაშლის და მოზარდების ღამე იქ დატოვების. რატომ ვერ განხორციელდა ეს იდეა?

- ბევრი ასეთი იდეა ვთქვით, რეაგირებაც მოახდინეს, მაგრამ ვერ გაგრძელდა. გარკვეულწილად დამატებით ფინანსებთანაც არის დაკავშირებული იქ ღამით ხალხის დარჩენა. თუმცა, იდეა მაინც საინტერესოა და ვფიქრობ, განხორციელებადიც. სამაგიეროდ, თეატრებმა დაიწყეს ღამით სპექტაკლების ჩატარება. მაგალითად, მოზარდმაყურებელთა თეატრმა გააკეთა და ახლა აპირებს რუსთაველის 19 ღამის სპექტაკლების გაკეთებას. ასევე რუსთაველის 19- ის დასი რეგიონებში გასვლას და ასაკოვანი ადამიანებისთვის ღამით ღონისძიებების ჩატარებას გეგმავს. თუმცა, ჩვენ ამის ორგანიზატორები არ ვართ.

- თბილისის ღამის ეკონომიკას უნდა ჰქონოდა თავისი სტრატეგია, რომელიც ჯერჯერობით შემუშავებული არ არის. რამ შეგიშალათ ხელი და როდის გექნებათ ეს სტრატეგია?

- ძალიან გვინდა სტრატეგია პროფესიონალმა კომპანიებმა გააკეთონ, ვისაც მსგავსი სტრატეგიები სხვადასხვა ქალაქებისთვის აქვს გაკეთებული. საქართველოშიც არის ასეთი კომპანიები. გამოვაცხადეთ ტენდერი სტრატეგიის შექმნაზე, მაგრამ ვერავინ გაიმარჯვა, ვერ დააკმაყოფილეს ჩვენი მოთხოვნები. ახლა თავიდან გვაქვს გამოცხადებული და ჯერ არ ვიცით გამარჯვებული. სტრატეგიის არსებობა სასურველია. მნიშვნელოვანია ასევე გაირკვეს ჩვენ ვინ ვართ. ეს არის დროებითი ფორმაცია, რომელიც გარკვეულ საფუძველს ამზადებს, თუ რეგულარულად უნდა ჰქონდეს ქალაქს ეს სამსახური. ესეც გასარკვევია. ვფიქრობ, ამ ეტაპზე ეს არის სამსახური, რომელიც გარკვეულ პლატფორმას მოამზადებს, მერე გამოჩნდება ეს სამსახურებში გადანაწილდება თუ ერთი ერთეული იქნება.

- აპირებდით თბილისის ცალკეული რაიონების განვითარებას, მაგალითად, იდეა გქონდათ გლდანის განვითარებასთან დაკავშირებით. რა ეტაპზეა რაიონების პოტენციალის შესწავლა და ზოგადად, რჩება თუ არა ეს მიმართულება პრიორიტეტად?

- რა თქმა უნდა, ეს პრიორიტეტულია და პროცესი დაწყებულია. ერთია რადიოქარხნის პროექტი, რაზეც გამოცხადებულია აუქციონი და იმედი მაქვს, გამარჯვებული გამოცხადდება.

თამთა კაკაურიძე

„ინტერპრესნიუსი“