მრიცხველის ჩვენების დაფიქსირებას GWP- ს აბონენტები განახლებული ვებგვერდის მეშვეობით შეძლებენ

მრიცხველის ჩვენების დაფიქსირებას "ჯორჯიან უოთერ ენდ ფაუერის" აბონენტები განახლებული ვებგვერდის მეშვეობით შეძლებენ.

ინტერნეტ-პორტალზე - mygwp.ge წვდომას და მრიცხველის ჩვენების ონლაინ-რეჟიმში დაფიქსირებას თბილისელი აბონენტები უკვე კომპანია "ჯორჯიან უოთერ ენდ ფაუერის" განახლებული ვებგვერდის მეშვეობით შეძლებენ ბმულზე გადასვლით: http://mygwp.ge/Login.aspx.

"ჯორჯიან უოთერ ენდ ფაუერის" პრესსამსახურის ინფორმაციით, მრიცხველის მქონე ნებისმიერ აბონენტს შეუძლია ისარგებლოს ინტერნეტ-პორტალით - mygwp.ge, ონლაინ-რეჟიმში დაუკავშირდეს "ჯორჯიან უოთერ ენდ ფაუერს" და გაუგზავნოს მრიცხველის ჩვენება, რომელიც ავტომატურად აისახება კომპანიის ბილინგის სისტემაში და ქვითარშიც დაფიქსირდება. შედეგად, მოხმარებული წყლის საფასურს აბონენტი მის მიერ მითითებული მრიცხველის ჩვენების შესაბამისად გადაიხდის, კვარტალში ერთხელ კი მრიცხველის ჩვენებას კომპანიის წარმომადგენელი აიღებს. შესაბამისად, კვარტალში ერთხელ აბონენტს გადასახადი კომპანიის წარმომადგენლის მიერ აღებული ჩვენების საფუძველზე, ასევე ქვითრით მიუვა.

იმისთვის, რომ გამრიცხველიანებულმა აბონენტებმა ისარგებლონ ინტერნეტ-პორტალის მომსახურებით, მათ კომპანიის რაიონულ სერვისცენტრებში ხელშეკრულება უნდა გააფორმონ, რადგან mygwp.ge -ზე წვდომის შესაძლებლობა მხოლოდ ხელშეკრულების მქონე აბონენტს მისთვის მინიჭებული უნიკალური პაროლის მეშვეობით შეეძლება. განახლებულ პაროლს მომხმარებელი ყოველთვიურად SMS-შეტყობინებით მიიღებს, ხელშეკრულებაში მითითებული მობილური ტელეფონის ნომერზე.

"ჯორჯიან უოთერ ენდ ფაუერმა" მოდერნიზებულ ვებგვერდზე http://www.georgianwater.com კიდევ ერთი ახალი სერვისი აამოქმედა - ონლაინ-ჩეთის მეშვეობით, აბონენტებს შეუძლიათ ინტერაქტიურ რეჟიმში დაამყარონ ურთიერთობა კომპანიასთან. ნებისმიერ დაინტერესებულ მომხმარებელს, 09:00 საათიდან ღამის 24.00 საათამდე შეუძლია ეწვიოს ონლაინ-ჩეთს და წყალმომარაგებასთან თუ კომპანიის სხვა მომსახურებასთან დაკავშირებით ონლაინ რეჟიმში ესაუბროს ჩეთის ოპერატორებს.