ბოლო 3 თვეში ბიძინა ივანიშვილის ქონება გაიზარდა

Bloomberg-ის მილიარდერთა სიაში სულ 500 მილიარდერია.

აღსანიშნავია, რომ რეიტინგში საქართველოდან მხოლოდ ბიძინა ივანიშვილია, რომლის ქონებაც 2019 წლის 28 ივნისის მდგომარეობით, 5.32 მლრდ დოლარად არის შეფასებული. ამასთან, ამ დროისთვის ივანიშვილი Bloomberg-ის მილიარდერთა სიაში 350-ე ადგილზეა.

როგორც „ბლუმბერგის“ მილიარდერთა ინდექსშია აღნიშნული, მისი ქონება ბოლო სამ თვეში 100 მლნ დოლარით არის გაზრდილი. ცნობისთვის, 2019 წლის 28 მარტის მდგომარეობით, მისი ქონება 5.22 მილიარდ დოლარად იყო შეფასებული. 28 ივნისის მდგომარეობით კი - 5.32 მლრდ-ს შეადგენს.

5.32 მლრდ დოლარად ბიძინა ივანიშვილს შეუძლია შეიძინოს 4.31 მილიონი უნცია ოქრო და 100 მილიონი ბარელი ნავთობი. მისი ქონება უტოლდება შეერთებული შტატების მშპ-ს 0.0296%-ს, შეერთებულ შტატებში „ტოპ“ 200 აღმასრულებელი დირექტორისთვის მიცემული კომპენსაციის 84%-ს, შეერთებული შტატების „ტოპ“ 100 კოლეჯის შეწირულობის 1.34%-ს.

აღსანიშნავია, რომ მილიარდერების ინდექსის თანახმად, ივანიშვილის ქონება ყველაზე მაღალი - 2013 წელს იყო, როცა 6.40 მლრდ აშშ დოლარს შეადგენდა.

გამოცემას ბიზნესმენთან დაკავშირებით მცირე ინფორმაციაც აქვს დატანილი, სადაც ივანიშვილის ბიზნეს საქმიანობის დაწყებისა და პოლიტიკური კარიერის მოკლე ისტორიაა ასახული.

„ივანიშვილმა კარიერა პოსტ-საბჭოთა რუსეთში 1990-იან წლებში რკინის მადნის მოპოვებაში, ბანკებსა და უძრავ ქონებაში ფულის ჩადებით დაიწყო. თავისი აქტივების უმეტესობა 2003-2006 წლებში გაყიდა, დანარჩენი ნაწილი გაიყიდა საქართველოში პრემიერ-მინისტრად არჩევამდე 2012 წელს. ერთი წლის შემდეგ კი ის თანამდებობიდან გადადგა,“ - იუწყება გამოცემა.

ცნობისთვის, Bloomberg-ის მილიარდერების ინდექსი მსოფლიოს ყველაზე მდიდარი ადამიანების ყოველდღიური რეიტინგია.

თაია არდოტელი