,,ევროპის საინვესტიციო ბანკის“ წარმომადგენლებმა ფოთის სპორტკომპლექსის მშენებლობა დაათვალიერეს

ევროპის საინვესტიციო ბანკის (EIB) წარმომადგენლებმა რეგიონული განვითარებისა და ინფრასტრუქტურის მინისტრის მოადგილე გრიგოლ კაციასთან, მუნიციპალური განვითარების ფონდის აღმასრულებელ დირექტორთან გიორგი შენგელიასთან და სამეგრელო - ზემო სვანეთის სახელმწიფო რწმუნებულთან ალექსანდრე მოწერელიასთან ერთად ფოთში სპორტკომპლექსის მშენებლობის პროცესი დაათვალიერეს.

რეგიონული განვითარებისა და ინფრასტრუქტურის სამინისტროს ცნობით, ფოთში მრავალფუნქციური სპორტული კომპლექსისა და საცურაო აუზის მშენებლობას საქართველოს მუნიციპალური განვითარების ფონდი ევროპის საინვესტიციო ბანკის დაფინანსებით ახორციელებს და მისი ღირებულება 14.5 მილიონი ლარია.

სპორტკომპლექსის სამშენებლო სამუშაოები დიდი და მცირე საცურაო აუზების და ფიტნეს დარბაზის მშენებლობას ითვალისწინებს. სპორტულ კომპლექსში მოეწყობა საშხაპეები, ოთახები მწვრთნელებისთვის, მსაჯებისთვის, პერსონალისთვის და ექიმისთვის. განთავსდება კაფე და საერთო საცხოვრებელი სპორტსმენებისთვის.

ახალი კომპლექსი სპორტით დაინტერესებულ ადამიანებს საშუალებას მისცემს კეთილმოწყობილ გარემოში ივარჯიშონ და სპორტის მრავალ სახეობაში გამართონ ტურნირები, როგორც ეროვნულ, ისე საერთაშორისო დონეზე.

სპორტკომპლექსის მშენებლობა მიმდინარე წლის ბოლოს დასრულდება.