საქართველოში საბადოს დახურვისა და რეგენერაციის თანამედროვე მეთოდოლოგია დაინერგება
საქართველოში საბადოს დახურვისა და რეგენერაციის თანამედროვე მეთოდოლოგია დაინერგება. ამის შესახებ ინფორმაციას საქართველოს ეკონომიკისა და მდგრადი განვითარების სამინისტრო ავრცელებს. მათივე ცნობით, ეკონომიკისა და მდგრადი განვითარების სამინისტროს სსიპ წიაღის ეროვნულმა სააგენტომ მსოფლიო ბანკის (WB) ფინანსური მხარდაჭერით დაიწყო პროექტი - საბადოთა დახურვა და ეკონომიკური რეგენერაცია.
პროექტის მიზანია მიტოვებული ან დასახურად მომზადებული საბადოების ამჟამინდელი მდგომარეობი შესახებ სრული და ზუსტი ინფორმაციის მოპოვება. შედეგად, ჩამოყალიბდება და დაინერგება საბადოთა დახურვისა და სამთო-მოპოვებითი ფართობის რეკულტივაციისა და რეგენერაციის სახელმძღვანელო ჩარჩო.
უწყების განმარტებით, პროექტის ფარგლებში მოხდება საუკეთესო საერთაშორისო პრაქტიკის გაზიარება, სახელმწიფოს მხრიდან საბადოთა დახურვის სათანადო მოთხოვნების შემუშავებისა და ღონისძიებების ეფექტურად განხორციელების მიზნით. ამასთან, კვლევის ფარგლებში განხორციელდება მიტოვებულ საბადოთა აღრიცხვა და რისკის შემცველ საკითხთა იდენტიფიცირება, ასევე ინსტიტუციური და მარეგულირებელი ხარვეზების გამოვლენა, შემდგომში ზოგადი პრინციპებისა და სტანდარტების შემუშავების მიზნით.
მათივე ინფორმაციით, პროექტის განსახორციელებლად შერჩეულ იქნა საერთაშორისო საკონსულტაციო ჯგუფი SRK Consulting. კომპანიის წარმომადგენლები პირველი სამუშაო ვიზიტით საქართველოში იმყოფებიან და შეხვედრებს მართავენ სხვადასხვა უწყების წარმომადგენლებთან. ვიზიტის ფარგლებში მოხდება არსებული საბადოების საველე დათვალიერება.
ამასთანავე, ეკონომიკისა და მდგრადი განვითარების სამინისტროს ინფორმაციით, მიმდინარე წლის სექტემბრის თვეში დაგეგმილია სწავლების ჩატარება დაინტერესებულ მხარეთა ჩართულობით, ასევე კვლევის წინასწარი შედეგების გაზიარება.