დონალდ ტრამპი აცხადებს, რომ Huawei-სთან ბიზნესის კეთება არ სურს

ამერიკის შეერთებული შტატების პრეზიდენტი დონალდ ტრამპი აცხადებს, რომ მას არ სურს აშშ-მა ჩინურ კომპანია Huawei-სთან ბიზნესი აწარმოოს.

ამის შესახებ ინფორმაციას სააგენტო „როიტერსი“ ავრცელებს.

„ჩვენ არ ვაპირებთ [Huawei-თან] ბიზნესი ვაწარმოოთ. საერთოდ არ მსურს მასთან ბიზნესის კეთება, ვინაიდან ეს საფრთხეს უქმნის ეროვნულ უსაფრთხოებას და ვთვლი, რომ მედიამ აღნიშნული საკითხი ცოტა განსხვავებულად გააშუქა“, - განაცხადა ტრამპმა.

დასავლურმა მედიასაშუალებებმა ორი დღის წინ გაავრცელეს ინფორმაცია, რომლის თანახმადაც, აშშ-ს კომერციის დეპარტამენტი Huawei-ს „დროებით ზოგად ლიცენზიას“ 90 დღით გაუხანგრძლივებს, რაც მას მომხმარებელთა მომსახურების მიზნით ამერიკული კომპანიებისგან პროდუქციის ყიდვის საშუალებას აძლევს.