თბილისის მერიამ 31 ინფრასტრუქტურული ტენდერი შეწყვიტა
შეჩერებულ პროექტთა შორის არის ზაჰესის სარკინიგზო ხიდის მშენებლობა, საცხოვრებელი კორპუსების რეაბილიტაცია და სპორტული მოედნების მშენებლობა.
თბილისის მერის მოადგილის, გიორგი ხელაიას განაცხადებით, ტენდერების შეწყვეტის მიზეზი არაკვალიფიციურად შედგენილი ხელშეკრულებებია.
"შეწყვეტილია 31 ინფრასტრუქტურული ტენდერი, აღნიშნულის მიზეზი გახლავთ ის, რომ თვითონ ხელშეკრულებები იყო შედგენილი არაკვალიფიციურად. არ იყო განსაზღვრული, მკაფიოდ გამოკვეთილი კონტრაქტორთა ვალდებულებები. ჩვენ მივიღეთ გადაწყვეტილება, რომ გავამკაცროთ მთელი რიგი ვალდებულებები, რომელიც შეეხება კონტრაქტორების მიერ საგარანტიო პირობების შესრულებას. ასევე გადაიხედება მთლიანად იურიდიული კუთხით და მოხდება მისი იურიდიული დახვეწა. ამ ხელშეკრულების საბანკო გარანტიის წარმოდგენის შემთხვევაში, საავანსო თანხის გაცემის წესი შეიცვლება, ასევე მოხდება სამუშაოების შესრულებაზე მკაცრი კონტროლი", - აღნიშნა ხელაიამ.
მისივე თქმით, თბილისის მერიის შესაბამისი სამსახურები, მუდმივმოქმედი ჯგუფები იმუშავებენ და ტენდერებზე კონტროლს განახორციელებენ.
"მინდა გავაფრთხილო ყველა ის ადამიანი, ვინც მიიღებს ასეთ ტენდერებში მონაწილეობას, ჩვენი მხრიდან იქნება უმკაცრესი კონტროლი დაწესებული სამუშაოთა მიმდინარეობის პერიოდში შესრულებული სამუშაოს ხარისხზე. ამ კუთხით ჩვენ გვაქვს ახალი რეგულაცია, ამ მთლიანი კონტრაქტის 5% დაკავდება და მისი გადახდა მოხდება ორ ნაწილად, პირველი ნაწილი იქნება, როდესაც დასრულდება კონტრაქტი და მეორე ნაწილი, როდესაც დასრულდება შესრულებული სამუშაოს საგარანტიო ვადა", - განაცხადა მერის მოადგილემ.
მისივე თქმით, თბილისის მთავრობისთვის პრიორიტეტად რჩება შესრულებული სამუშაოს ხარისხი და ამას დიდი ყურადღება მიექცევა.
ამ დროისთვის არსებული ინფორმაციით, შეჩერებულ პროექტთა შორის არის ზაჰესის სარკინიგზო ხიდის მშენებლობა, საცხოვრებელი კორპუსების რეაბილიტაცია და სპორტული მოედნების მშენებლობა.