რამდენ ადამიანს ამოეწურა მართვის მოწმობაზე მინიჭებული 100 ქულა და შეუჩერდა მისი მოქმედება
შინაგან საქმეთა სამინისტრომ მართვის მოწმობაზე მინიჭებულ ქულათა 2019 წლის მე-2 კვარტლის მონაცემები გამოაქვეყნა.
როგორც სტატისტიკიდან ირკვევა, საანგარიშო პერიოდში მთელი ქვეყნის მასშტაბით 30 ადამიანს სრულად ამოეწურა 100 ქულა. ამასთან, უწყების ცნობითვე, ამათგან 29 ადამიანს მართვის მოწმობის მოქმედება შეჩერებული აქვს, ხოლო - 1-მა პირმა გამოცდა ჩააბარა.
რაც შეეხება რეგიონებს, მართვის მოწმობაზე მინიჭებულ ქულათა სრულად ამოწურვის შემთხვევები დაფიქსირდა - აჭარაში, თბილისში, იმერეთში, კახეთში, მცხეთა-მთიანეთის, სამეგრელო-ზემო სვანეთის, სამცხე-ჯავახეთისა და ქვემო ქართლის რეგიონებში.
აღსანიშნავია, რომ ოფიციალური სტატისტიკით, საანგარიშო პერიოდში მართვის მოწმობაზე მინიჭებული 100 ქულა ყველაზე მეტ - 17 ადამიანს თბილისში ამოეწურა.
ამასთან, უწყების მონაცემებით, 2019 წლის მე-2 კვარტლის მდგომარეობით, მართვის მოწმობაზე ქულები 148 968 პირს დააკლდა, ხოლო 30 ივნისის მდგომარეობით, 1 080 826 ადამიანს 100 ქულა სრულად ჰქონდა შენარჩუნებული.
