მარნეული-ხაიშის დამაკავშირებელი გზის რეაბილიტაცია დასრულდა

შიდასახელმწიფოებრივი მნიშვნელობის მარნეული-თეთრიწყარო-წალკის საავტომობილო გზაზე, მარნეული-ხაიშის 6 კმ-მდე მონაკვეთის რეაბილიტაცია დასრულდა.

საქართველოს საავტომობილო გზების დეპარტამენტის ინფორმაციით, არსებული ამორტიზებული გზა, ქალაქ მარნეულის ცენტრიდან სოფელ ხაიშამდე, ავტოტრანსპორტის უსაფრთხო გადაადგილების უზრუნველსაყოფად სასწრაფოდ საჭიროებდა რეაბილიტაციას.

მათივე ცნობით, პროექტის ფარგლებში, გაძლიერდა საგზაო კონსტრუქცია და დაიგო 2-ფენიანი ასფალტ-ბეტონის საფარი, მოეწყო ხელოვნური ნაგებობები, ადგილობრივ გზებთან მიერთებები, მოსახლეობის ეზოებში შესასვლელები, ავტობუსის გასაჩერებელი მოედნები და საგზაო ნიშნები. ასევე, დასრულდა გზის ჰორიზონტალური მონიშვნის სამუშაო და მოწესრიგდა სანიაღვრე არხები.

პროექტის მსოფლიო ბანკის ფინანსური მხარდაჭერით, შიდასახელმწიფოებრივი და ადგილობრივი გზების რეაბილიტაციის III პროექტის (SLRP III) ფარგლებში განხორციელდა. სამუშაოების ღირებულებამ 4,7 მლნ ლარი შეადგინა.