ბოლო 20 წლის განმავლობაში ევროკავშირში უმუშევრობის დონე მინიმუმამდე შემცირდა
ბოლო 20 წლის განმავლობაში ევროკავშირში უმუშევრობის დონე მინიმუმამდე შემცირდა. ამის შესახებ სტატიას Euronews აქვეყნებს.
ევროკავშირის ოფიციალური სტატისტიკის სააგენტოს მონაცემებით, მიმდინარე წლის აგვისტოში ევროკავშირის ქვეყნებში უმუშევრობის დონე 6.3%-მდე შემცირდა. აღსანიშნავია, რომ 2018 წლის ანალოგიურ პერიოდში ევროკავშირში უმუშევრობის დონე 6.7% იყო.
სტატისტიკის სააგენტოში განმარტავენ, რომ უმუშევრობის დონე ქვეყნებს შორის გასხვავდება და ზოგიერთ მათგანში შემცირების ნაცვლად, პირიქით გაზრდილია.
მაგალითად, დანიაში უმუშევრობა 4.9-დან 5%-მდე, ლიეტუვაში კი 6.1-დან 6.6%-მდე გაიზარდა.
ევროკავშირის წევრ ქვეყნებს შორის უმუშევრობის ყველაზე დაბალი მაჩვენებელი ჩეხეთშია და 2%-ს შეადგენს. მას გერმანია და მალტა მოჰყვებიან 3.1 და 3.3%-ით.
უმუშევრობის ყველაზე მაღალი მაჩვენებელი კი საბერძნეთშია და 17%-ს შეადგენს. მას ესპანეთი და იტალია მოჰყვებიან 13.8 და 9.5%-ით.
აღსანიშნავია, რომ ევროკავშირის არსებობის განმავლობაში, ევროზონასთან შედარებით, (რომელიც ევროკავშირის 19 ქვეყანას აერთიანებს და ოფიციალურ ვალუტად ევროა აღიარებული) უმუშევრობის დონე უფრო დაბალი პირველად აღმოჩნდა. დღეის მდგომარეობით, ევროზონაში უმუშევრობა 7.4%-ს შეადგენს.
