"რეზონანსი" - სამშენებლო სექტორი ჭაობშია - ბინები ძვირდება, კლიენტები კი სადღაც გაქრნენ

ბოლო დროს განსაკუთრებით გაუფასურებულმა ლარმა სამშენებლო სექტორს დიდი პრობლემები შეუქმნა და ახალი გამოწვევის წინაშე დააყენა. დევალვაციამ, სხვა ყველა სექტორთან ერთად, ზეგავლენა სამშენებლო ბაზარზეც მოახდინა. იმპორტირებული მასალების გაძვირების გამო, სამშენებლო სექტორის წარმომადგენლები იძულებულნი გახდნენ, მშენებარე ბინებზე ფასი გაეზარდათ, ამის გამო კი ბაზარზე რეალიზაციამ იკლო, რადგან მოსახლეობის მსყიდველუნარიანობა მკვეთრად დაეცა. ამიტომ ბევრი დეველოპერი ფინანსურ კრიზისში აღმოჩნდა.

სამშენებლო სფეროს ზრდის ტემპი წლიდან წლამდე იკლებს. 2018 წლის მეორე კვარტალში სექტორის ბრუნვა მხოლოდ 4.5%-ით გაიზარდა და 1.76 მლრდ ლარი შეადგინა მაშინ, როცა 2017 წლის მეორე კვარტალში 21%-მდე ზრდა იყო, 2016 წელს კი - 42.3%.

სტატისტიკის ეროვნული სამსახურის წინასწარი ინფორმაციით, 2018 წელს მშენებლობის სექტორის ბრუნვა მიმდინარე ფასებში დაახლოებით 3.2 მილიარდი ლარი იყო. წინა წელთან შედარებით სამშენებლო სექტორი 3.1%-ით შემცირდა. 2017 წელს კი მთლიანი დარგი 13.5%-ით იყო გაზრდილი.

ბოლო პერიოდში შემოღებულ რეგულაციებთან ერთად, სამშენებლო დარგს დიდი დარტყმა ლარის გაუფასურებამ მიაყენა. ბინების თვითღირებულება გაიზარდა, მაგრამ გაყიდვა შემცირდა, რადგან პოტენციურ კლინტებს სულ უფრო მეტად უჭირთ მსხვილი შენაძენის გაკეთება.

სამშენებლო სამართლის სპეციალისტის, უჩა ზაქაშვილის განცხადებით, რეგულაციები მხოლოდ ბიუროკრატიული მიზნებისთვის შემოიღეს. იგი იმ რეგულაციებსაც ასახელებს, რომელიც საერთოდ არც კი გამოიყენება პრაქტიკაში.

“არასწორი იქნება მხოლოდ და მხოლოდ რეგულაციებზე გავამახვილოთ ყურადღება. ყველაფერი კომპლექსურად მოქმედებს, მათ შორის უცხოელებზე დაწესებული შეზღუდვებიც აისახა გაყიდვებზე. საბანკო რეგულაციების დაწესების შემდეგ, საკმაოდ რთული ვითარება შეიქმნა სამშენებლო ბაზარზე. პარალელურად თბილისის მერიის ახალმა გენერალურმა გეგმამ და უსაფრთხოების ნორმებმა ბევრი ტერიტორია შეზღუდა სამშენებლო განვითარებისთვის. მერიისა და შრომის ინსპექციის ერთობლივი მონოტორინგის შედეგად უამრავი მშენებლობა შეჩერდა და ყველაფერმა, ცხადია, სექტორზე უარყოფითად იმოქმედა.

თუმცა იმის თქმა, რომ თბილისის გარკვეულ უბნებში მშენებლობის შეზღუდვა ცუდია, არ იქნება მართებული, რადგან დედაქალაქისთვის ეს საკმაოდ პრობლემატური საკითხია.

უნდა ვთქვათ ისიც, რომ ზოგიერთი რეგულაცია რეალურად არც კი გამოიყენება იმ მიზნებისთვის, რისთვისაც შემოიღეს და ძირითადად ბიუროკრატიულ დაბრკოლებებს და სირთულეებს ქმნის. მაგალითად, ასეთია სატრანსპორტო კვლევების სავალდებულო ნაწილად გადაქცევა. რეალურად ეს არის კვლევა კვლევისთვის და არანაირი სატრანსპორტო კვანძების გაუმჯობესება არ მიმდინარეობს. იგივე შემიძლია ვთქვა მშენებლობისა და სახანძრო უსაფრთხოებაზე. ეს სამივე რეგულაცია დიდწილად გამოიყენება, როგორც ბიუროკრატიული მექანიზმი და არა ამ არსებული მდგომარეობის გაუმჯობესების საშუალება”, - განუცხადა “რეზონანსს” უჩა ზაქაშვილმა.

სამშენებლო ბაზარზე, ახალ ბინებზე გაზრდილი ფასის გამო, მსყიდველუნარიანობამ საკმაოდ იკლო. უძრავი ქონების შეძენაზე დღითი დღე უფრო ნაკლებია მოთხოვნა. “აიჯის ჯგუფის” ხელმძღვანელი შოთა გუჯაბიძე ადასტურებს, რომ მენაშენეებიც დიდი დანახარჯში ვარდებიან და მათთვის გაძვირება საკმაოდ რთულია.

“პირველ რიგში, ლარის გაუფასურება ყველაზე მძაფრად აისახება კლიენტების მსყიდველუნარიანობაზე. მოსახლეობის უმეტესობას, დაახლოებით 95%-ს, შემოსავალი აქვს ლარში. მიუხედავად იმისა, რომ უკვე ფასის გამოცხადება ხდება ეროვნულ ვალუტაში, მენაშენეები მაინც დოლარს იყენებენ და მისი ეკვივალენტს სთავაზობენ მომხმარებელს უკვე ლარში ფასად. დღეს, როცა დევალვაცია მზარდია, ხალხის მსყიდველუნარიანობა დაცემულია და უძრავი ქონების ბაზარი მაინც დოლარზე მიბმული რჩება, ეს ბევრ პრობლემებს ქმნის. და ასეა, არა მარტო უძრავ ქონებაზე, არამედ ყველა იმ პროდუქტზე, რომელიც დოლარის კურსზეა მიბმული.

ლარის გაუფასურების გავლენა, უძრავი ქონების ბაზრისთვის არის ყველაზე დიდი დარტყმა. პირველ რიგში ის, რომ მოსახლეობის მსყიდველუნარიანობა ეცემა და უფრო ნაკლები წვდომაა შესაძენ ქონებაზე. მეორეც, თავად მენაშენეებისთვისაც ძნელია ასეთ პირობებში საქმიანობა. სამშენებლო პროცესი და საბოლოო პროდუქტი (ბინები) ძვირდება, თავად მშენებლებს რჩებათ მინიმალური მოგება და დიდ დანახარჯებში ვარდებიან. შესაბამისად, ბაზარიც დავარდნილია და მოსახლეობის მსყიდველუნარიანობა ვერ ეწევა ახალ ფასებს”, - განაცხადა შოთა გუჯაბიძემ.

სამშენებლო კომპანია “ორბის” წარმომადგენელი ვაჟა ნავროზაშვილი, “რეზონანსთან” ადასტურებს, რომ ახალაშენებულ ბინებში, თითოეული კვადრატული მეტრის ფასი გაიზარდა და ამიტომ მომხმაებლების მსყიდველუნარიანობა საკმაოდ დაეცა. რადგანაც აშენებული ბინების რეალიზაცია ვერ ხერხდება, მშენებლობის ტემპიც დაეცემა.

“ლარის გაუფასურების გამო, რა თქმა უნდა, თვითღირებულება გაიზარდა, რაც მოსახლეობის ზურგზე გადადის. თითოეული კვადრატული მეტრის ფასი გაზრდილია იმის მიხედვით, თუ როგორ ბინას იძენს მოქალაქე. მოსახლეობის მსყიდველუნარიანობა შემცირებულია, რეალიზიცია შეჩერებულია.

ბინები იმ ოდენობით აღარ იყიდება, როგორც წინა წლებში ან თუნდაც წინა თვეებში. აქედან გამომდინარე, მშენებლობის ტემპიც დაეცემა, რადგან ამდენი ფინანსური რესურსი არ არსებობს, რომ სახლი ააშენონ და მერე იცადონ, როდის გაიყიდება.

ინფორმაცია მოვისმინე, რომ ეროვნულმა ბანკმა შეიძლება შეღავათები დააწესოს, რომ სესხის გაცემა დოლარში მოხდეს. ამან შეიძლება პატარა გავლენა იქონიოს ბაზარზე და ვითარება შეამსუბუქოს”, - განუცხადა “რეზონანსს” ვაჟა ნავროზაშვილმა.

გვანცა წულაია

გაზეთი "რეზონანსი"