რა ქონებას ფლობს ვანო ზარდიაშვილი, რომელიც დეპუტატის მანდატს ტოვებს

ვანო ზარდიაშვილი დეპუტატის მანდატს ტოვებს. ამის შესახებ ზარდიაშვილმა სპეციალური განცხადება გაავრცელა.

„არ აქვს მნიშვნელობა როგორი ბინძური გზებით შეძლეს ჩემი დაკავშირება კონკრეტულ თემებთან თუ გამოგონილ ინტერესებთან. მიუხედავად იმისა, რომ სიმართლე კონკრეტულ შემთხვევაშიც ჩემს მხარესაა, ნამდვილად არ მინდა ვიყო პროვოკაციების წყარო იმ ადამიანების თუ პოლიტიკური ჯგუფებისთვის, რომლებიც პოლიტიკური დღის წესრიგის შექმნას და პოზიტიური პროცესების დაზიანებას ჩემზე შეტევით თუ ტალახის სროლით ცდილობენ. მე მივიღე გადაწყვეტილება დავტოვო საქართველოს პარლამენტი და დეპუტატის მანდატი. ამით კიდევ ერთხელ მივანიშნებ საზოგადოებას, რომ თანამდებობა არის მხოლოდ საშუალება გამოადგე შენს ქვეყანას და ემსახურო თითოულ მოქალაქე,“ - ნათქვამია განცხადებაში.

„ბიზნესპრესნიუსი“ დაინტერესდა რა ქონებას ფლობს დეპუტატი ვანო ზარდიაშვილი და როგორია მისი ფინანსური მდგომარეობა.

როგორც მის მიერ 28 ივნისს შევსებული ქონებრივი დეკლარაციიდან ირკვევა, გასული წლის განმავლობაში პარლამენტის წევრობისას მისმა შემოსავალმა 46 796 შეადგინა.

რაც შეეხება უძრავ-მოძრავ ქონებას, დეპუტატი რამდენიმე ბინის მესაკუთრეა. კერძოდ, მის საკუთრებაშია თბილისში 160 კვადრატული მეტრი ფართობის, 117 კვ. მეტრის და ოთხი 49 კვ. მეტრი ფართობის ბინა, რომელიც 2011-2013-2014 წლებში აქვს შეძენილი.

აღსანიშნავია, რომ დეკლარაციის მიხედვით, დეპუტატი და მისი ოჯახის წევრები არ ფლობენ მოძრავ ქონებას. რაც შეეხება ზარდიაშვილის ფინანსურ მდგომარეობას, ქონებრივი დეკლარაციის შევსების მომენტში საბანკო ანგარიშებზე 1558,6 ლარი და 34 448,43 დოლარი ჰქონდა. ეს უკანასკნელი დედის მიერ აშშ-დან გზავნილის სახით აქვს მიღებული.

ვანო ზარდიაშვილი მეუღლესთან და ორ შვილთან ერთად ცხოვრობს. მისი მეუღლე ფლობს: თბილისში 110 კვ. მეტრისა და ბათუმში 51,6 კვ. მეტრი ფართობის ბინებს, რომელიც 2017 წელს მშობლისგან აქვს ნაჩუქარი. მის საკუთრებაშია ასევე 60 კვ. მეტრი ფართობის კომერციული ფართი დედაქალაქში. მასვე დეკლარაციის შევსების მომენტში, სხვადასხვა საბანკო ანგარიშზე ჯამში, 2 825.09 ლარი და 2 100 ევრო ჰქონდა. ამასთან, ზარდიაშვილის მეუღლის შემოსავალმა გასულ წელს იუსტიციის უმაღლესი საბჭოს დეპარტამენტის უფროსის თანამდებობაზე - 48 576 ლარი, ტექნიკურ უნივერსიტეტში ლექტორობისას კი - 6 060,8 ლარი შეადგინა.