Sony PlayStation 5-ი 2020 წელს გამოვა
იაპონური კომპანია Sony მისი წარმოების სათამაშო კონსოლის ახალი თაობის Playstation 5-ის 2020 წელს გამოშვებას გეგმავს. ამის შესახებ კორპორაციის მიერ გავრცელებულ განცხადებაში წერია.
„ჩვენი ახალი თაობის კონსოლის სახელი იქნება PlayStation 5, და ჩვენ მას ბაზარზე გამოვიტანთ საახალწლო ფასდაკლებების დროს 2020 წლის ბოლოსთვის“, - ნათქვამია განცახდებაში.
მისი შემქმნელები გვპირდებიან, რომ სიახლე ახალი გეიმპადით გამოვა, თამაშის დროს გაუმჯობესებული ვიბრაციით. მაგალითისთვის, კონსოლზე ფეხბურთის მოთამაშეები იგრძნობენ სველ და მშრალ საფარს შორის თამაშის სხვაობას.
Playstation-ი პირველად 1994 წელს გამოვიდა, მაშინ მან ნამდვილი ფურორი მოახდინა სათამაშო კონსოლების ბაზარზე. მიუხედავად იმისა, რომ ის არ იყო პირველი 32-ბიტიანი ვიდეო კონსოლი. ის იმ დროისთვის ყველაზე პოპულარული სათამაშო გახდა - 12 წლის განმავლობაში კომპანიამ 102 მილიონი კონსოლის გაყიდვა მოახერხა.
