საქართველოში შესაძლოა, კონკურსი „მსოფლიოს საუკეთესო სომელიე 2022“ ჩატარდეს

საქართველო ოფიციალურად დასახელდა კანდიდატ ქვეყანად, სადაც შეიძლება, ჩატარდეს კონკურსი „მსოფლიოს საუკეთესო სომელიე 2022“. ამის შესახებ ინფორმაციას საქართველოს სომელიეთა ასოციაცია ავრცელებს.

მათი ცნობით, 5-8 ოქტომბერს საფრანგეთში, ქალაქ რეიმსში - გაიმართა საერთაშორისო სომელიეთა ასოციაციის (ASI) საიუბილეო, 50-ე გენერალური ასამბლეა.

„სიმბოლურია, რომ საერთაშორისო სომელიეთა ასოციაცია 50 წლის წინ სწორედ ამ ქალაქში დაფუძნდა.

საიუბილეო ასამბლეის სხდომაზე საქართველოს სომელიეთა ასოციაციის პრეზიდენტმა, შალვა ხეცურიანმა, წარადგინა განაცხადი, რომ კონკურსი „მსოფლიოს საუკეთესო სომელიე 2022“ საქართველოში ჩატარდეს. ასამბლეამ საქართველო კანდიდატ ქვეყანად უკვე ოფიციალურად დაასახელა.

ამ პატივის მოსაპოვებლად საქართველოს მეტოქეები არიან: საფრანგეთი, ახალი ზელანდია და ლატვია. საბოლოო ხმის მიცემა 13 დეკემბერს გაიმართება“, - აღნიშნულია საქართველოს სომელიეთა ასოციაციის მიერ გავრცელებულ ინფორმაციაში.