"მნიშვნელოვანია, ქართველ და უცხოელ ბიზნესმენებს შორის კონკრეტული ურთიერთობები ჩამოყალიბდეს"
„ჩვენთვის მნიშვნელოვანია ამ ფორუმზე შედგეს კონკრეტული ინტერაქცია, ჩამოყალიბდეს ურთიერთობები ქართველ და უცხოელ ბიზნესმენებს შორის, რომლებიც დაინტერესებული არიან საქართველოში ინვესტიციების ჩადებით“,- ამის შესახებ ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა სასტუმრო „ბილტმორში“ განაცხადა, სადაც მეორე დღეა ,,თბილისის აბრეშუმის გზის ფორუმი“ მიმდინარეობს.
როგორც „ინტერპერსნიუსს“ რეგიონული განვითარებისა და ინფრასტრუქტურის სამინისტროდან აცნობეს, ვიცე-პრემიერმა აღნიშნა, რომ კონკრეტული საქმიანი შეთანხმებების და ურთიერთობების იმედი აქვს.
,,ფორუმის ფარგლებში 300-ზე მეტი შეხვედრაა დაგეგმილი. ჩვენ გვაქვს საშუალება ხელი შევუწყოთ ყველა დაინტერესებულ მხარეს, გამონახონ შესაძლებლობები საქართველოში ბიზნესის საკეთებლად, შემოიტანონ ინვესტიციები. არსებული პოლიტიკური ურთიერთობები მნიშვნელოვანი ფაქტორია თანამშრომლობის განვითარებისთვის,“- განაცხადა მაია ცქიტიშვილმა.
ცნობისთვის, საქართველოს მთავრობის ორგანიზებით, რიგით მე-3 ,,აბრეშუმის გზის ფორუმში“ 60-მდე სხვადასხვა ქვეყნის 2000-მდე დელეგატი მონაწილეობს. ფორუმი“ აზიასა და ევროპას შორის პოლიტიკური, ეკონომიკური და კულტურული კავშირების გაძლიერებას ემსახურება, რომელზეც საერთაშორისო ორგანიზაციებისა და კერძო სექტორის წარმომადგენლები განიხილავენ ერთმანეთთან თანამშრომლობის გაღრმავების პერსპექტივებს.