"2020 წლის ბიზნესის კეთების რეიტინგში, საქართველომ ქულების მიხედვით ისტორიულ მაქსიმუმს მიაღწია"

ეკონომიკისა და მდგრადი განვითარების მინისტრის, ნათია თურნავას განმარტებით, ბიზნესის კეთების მსოფლიო ბანკის რეიტინგში საქართველომ ქულების მიხედვით ისტორიულ მაქსიმუმს მიაღწია, თუმცა „აშშ-მა ამ ეტაპზე ოდნავ მეტი გააკეთა ვიდრე საქართველომ“ და ამიტომ გვისწრებს ერთი პოზიციით.

როგორც თურნავამ მთავრობის სხდომის დასრულების შემდეგ განაცხადა, 10 ძირითადი ინდიკატორიდან საქართველოს 8-ში გაუმჯობესებული ქულები აქვს. ამასთან, ეკონომიკის მინისტრის თქმით, რეიტინგის მიხედვით, საქართველო კვლავაც რჩება რეგიონალურ ლიდერად და ევროპის და ცენტრალური აზიის 23 ქვეყანას შორის საქართველო კვლავაც პირველ ადგილზეა.

„2020 წლის ბიზნესის კეთების რეიტინგში საქართველომ მიაღწია ისტორიულ მაქსიმუმს თავისი ქულების მიხედვით, გააუმჯობესა შეფასების ზღვართან მიახლოებული ქულა, რომელიც ახლა არის 83.7 ქულა. ეს არის ისტორიულად მაღალი ქულა საქართველოსთვის. საქართველო კვლავაც რჩება 2020 წლის განმავლობაში რეგიონალურ ლიდერად, ევროპის და ცენტრალური აზიის 23 ქვეყანას შორის საქართველო ამ რეიტინგის მიხედვით არის კვლავაც პირველ ადგილზე. ასევე მინდა ვთქვა, რომ ეს რეიტინგი შედგება 10 სხვადასხვა ინდიკატორისგან, საიდანაც 8 ინდიკატორში საქართველოს აქვს სერიოზული გაუმჯობესება. აქედან გამომდინარე, ამ რეიტინგის მიხედვით საქართველომ კვლავაც მიაღწია პროგრესს და გააუმჯობესა ქულა. რაც შეეხება რეიტინგში დაკავებულ ადგილს, საქართველო მე-7 ადგილზე გავიდა, მიუხედავად იმისა, რომ ქულა არის გაუმჯობესებული და აქ უნდა ითქვას, რომ აშშ-მ გაგვასწრო ერთი ადგილით. ასე რომ, დღესდღეობით კონკურენციაში ვართ - ვინ არის უფრო გახსნილი და თავისუფალი, აშშ თუ საქართველო. ერთი ადგილით გვისწრებს აშშ, მაგრამ ჩვენი ქულა არის გაუმჯობესებული და ისტორიულ მაქსიმუმს აღწევს“, - განაცხადა ნათია თურნავამ.

რაც შეეხება კონკრეტულ მიმართულებებს, სადაც საქართველოს ქულები აქვს გაუმჯობესებული, ეკონომიკის მინისტრი ამბობს, რომ ბიზნესის დაწყების ინდიკატორში, საქართველოს თითქმის მაქსიმალური ქულა აქვს.

„რეიტინგი შედგება 10 სხვადასხვა ინდიკატორისგან. აქედან 8 ინდიკატორში გვაქვს გაუმჯობესება. კერძოდ, ეს არის ბიზნესის დაწყების ინდიკატორი, სადაც თითქმის 100 ქულას ანუ მაქსიმუმს ვაღწევთ; მშენებლობის ნებართვების ინდიკატორი; ელექტროენერგიის ქსელთან მიერთება, სადაც ყველგან გაუმჯობესება გვაქვს; ქონების რეგისტრაცია; მინორიტარული ინვესტორთა უფლებების დაცვა; გადასახადების გადახდის პროცესი; ვაჭრობა საზღვრებს მიღმა; გადახდისუუნარობა; ანუ 8 ძირითადი ინდიკატორი 10-დან არის გაუმჯობესებული. დანარჩენ ორში არ გვაქვს ცვლილება და ეს არის ძირითადად ის შეფასებები, რამაც განაპირობა ჩვენი ჯამური ქულის ზრდა. ისევ ვრჩებით ლიდერებს შორის. აშშ-მა ამ ეტაპზე ოდნავ მეტი გააკეთა ვიდრე საქართველომ“, - განაცხადა თურნავამ.