ზელენსკის ადმინისტრაციამ მსხვილმასშტაბიანი პრივატიზაცია დაიწყო
უკრაინის პრეზიდენტმა ხელი მოაწერა კანონს, რომელიც ითვალისწინებს ქვეყნის მასშტაბით სახელმწიფოს კუთვნილი 1000 ქონების პრივატიზებას. აქამდე აღნიშნული ობიექტების პრივატიზება აკრძალული იყო.
„აღნიშნული ბრძანებით პრეზიდენტმა გააუქმა დიდი ხნის აკრძალვა მსხვილი ქონების პრივატიზებაზე“ , - წერს „კიევ პოსტი“.
პრეზიდენტის ოფისის წარმომადგენლის იულია კოვალივის განცხადებით, ბოლო 7 წლის განმავლობაში უკრაინის პარლამენტში იყო 8 მცდელობა ამ ჩამონათვალის შესამცირებლად, თუმცა უშედეგოდ. „ჩვენ მოხარულები ვართ, რომ პარლამენტი მხარს უჭერს ჩვენს ინიციატივას“, - განაცხადა მან.
გასაყიდად გამოტანილი მცირე ქონების რეალიზება მოხდება ProZorro საჯარო პლატფორმის საშუალებით, ხოლო მოგვიანებით მას დაემატება 16 მსხვილი სახელმწიფო ქონება, რომელშიც შედის მექანიკის საწარმო Azovmash-ი და სასუქის მწარმოებელი Odesa Portside Plant-ი.
ამ დროისთვის უცნობია, რა ოდენობის შემოსავალს მიიღებს სახელმწიფო ამ „დიდი პრივატიზების“ ფარგლებში, თუმცა იგივე კოვალივის განცხადებით, თუნდაც ერთი ალკოჰოლის მწარმოებელი სახელმწიფო კომპანიის UkrSpyrt-ის გაყიდვიდან ბიუჯეტში 5 მილიარდი გრივნა (200 მილიონი დოლარი) შევა.
პირველ ხუთ ობიექტს შორის, რომელიც საპრივატიზაციო სიაში მოხვდა, არის კიევის Dnipro Hotel და სოფლის მეურნეობის პროდუქციის მწარმოებელი Chaika.
Dnipro Hotel-ის გარდა, ასევე გაიყიდება სასტუმრო Ukraine, ასევე დასასვენებელი კურორტი Pushcha Vodytsya და სანატორიუმი Concha Zaspa კიევის გარეუბანში.
პრეზიდენტის ადმინისტრაციის ცნობით, პრივატიზებას 3-4 თვე დასჭირდება. ხოლო შემოსული თანხა მთლიანად მოხმარდება ვალების გასტუმრებას და სოციალური პროექტების დაფინანსებას.
